Հ.Աբրահամյանը կղեկավարի ՀՀԿ ընտրական շտաբը

Այսօր տեղի է ունեցել ՀՀԿ գործադիր մարմնի նիստ, որտեղ քննարկվել են կազմակերպական և այլ հարցեր: Ինչպես հաղորդում են ՀՀԿ մամուլի և հասարակայնության հետ կապերի վարչությունից, ՀՀԿ գործադիր մարմինը որոշել է Հովիկ Աբրահամյանին հաստատել ՀՀԿ ընտրական շտաբի պետի պաշտոնում:

Գործադիր մարմինը հավանության է արժանացրել` 

ա/ ՀՀԿ առաջիկա 13-րդ համագումարում ՀՀԿ նախագահի հաշվետվությունը իր և գործադիր մարմնի գործունեության մասին,

բ/ համագումարի բանաձևի նախագիծը: 

Նիստում քննարկվել է ՀՀԿ Աբովյանի շրջանային կազմակերպության անդամ Արթուր Գեղամի Հարությունյանի կուսակցական վարքագիծը:

Համարելով, որ միջանձնային հարաբերությունները երբեք չի կարելի տեղափոխել քաղաքական հարթություն, որ հատկապես անթույլատրելի են կոալիցիոն գործընկերների հանդեպ ոչ կոռեկտ արտահայտությունները, ՀՀԿ գործադիր մարմինը որոշել է Արթուր Գեղամի Հարությունյանին ՀՀԿ անդամին ոչ վայել վարքագծի համար հայտարարել խիստ նկատողություն: Արթուր Հարությունյանը հասարակությանը հայտնի է «Պալաչ» մականունով: 

Նշենք, որ ըստ մամուլի հրապարակումների, Ա. Հարությունյանը կոալիցիայի մաս կազմող ԲՀԿ առաջնորդի սանիկն է, ու վերջինիս մասին ասել էր. «Ծառուկյանը ուրացել է սուրբ մեռոնը»:

Նիստում քննարկվել են նաև առաջիկա համագումարի անցկացման հետ կապված կազմակերպական այլ հարցեր:

Հիշեցնենք, որ ՀՀԿ համագումարը տեղի կունենա մարտի 10-ին:

Հետևեք մեզ նաև Telegram-ում