Տարածաշրջանային և միջազգային կարևոր զարգացումները Times.am-ի դիտակետից։ Ի՞նչ է տեղի ունենում Հարավային Կովկասում և հարակից տարածաշրջաններում։ Կարդացեք միջազգային ամենակարևոր լուրերը մեր ամփոփ տեղեկագրում։
Զինված հարձակում Թեհրանում Ադրբեջանի դեսպանատան վրա
Այսօր առավոտյան 8։30-ի սահմաններում զինված հարձակում է տեղի ունեցել Իրանում Ադրբեջանի դեսպանատան վրա։
Ինչպես տեղեկացնում են իրանական և ադրբեջանական աղբյուրները, փոխհրաձգության ընթացքում զոհվել է դեսպանատան անվտանգության ծառայության պետը։ Եվս մեկ հոգի վիրավորվել է։
Թուրքիային ՆԱՏՕ-ից հեռացնելու հարց է դրվել
Թուրքիային անհրաժեշտ է հեռացնել ՆԱՏՕ-ից։ Այսպիսի կարծիք է հայտնել ԱՄՆ Ազգային անվտանգության հարցերով նախկին խորհրդական Ջոն Բոլթոնը՝ «The Wall Street Journal»-ում հրապարակած իր հոդվածում: Վերջինս հոդվածում նշել էր, որ թեև Թուրքիան դաշնակից երկիր է, ՆԱՏՕ-ի անդամ, սակայն իրեն այդ դաշինքի անդամ պետության նման չի դրսևորում։
Բոլթոնի այդ հոդվածին արձագանքել է Թուրքիայի իշխող «Արդարություն և զարգացում» (ԱԶԿ-AKP) կուսակցության խոսնակ Օմեր Չելիքը։ «ՆԱՏՕ-ի բոլոր առաքելություններում Թուրքիան առանցքային երկիրն է։ ՆԱՏՕ-ից Թուրքիայի հեռացման մասին խոսելը նույնն է, թե ՆԱՏՕ-ն լիկվիդացնելը»,- ասել է Չելիքը՝ հավելելով, որ Թուրքիան ՆԱՏՕ-ում «տանտեր» է, և բոլորը պետք է իմանան, որ Թուրքիան ՆԱՏՕ-ի ամենակարևոր երկրներից մեկն է։
ԱՄՆ-ն պահանջում է Թուրքիայից չսպասարկել ռուսական ինքնաթիռները
ԱՄՆ իշխանությունները ճնշում են գործադրում Թուրքիայի վրա՝ դադարեցնելու ռուսական ավիաընկերությունների՝ ամերիկյան արտադրության ինքնաթիռներով ժամանումներն ու թռիչքները սպասարկելու պրակտիկան:Այս մասին տեղեկացնում են ամերիկյան լրատվամիջոցները։
Անցյալ ամիս ԱՄՆ բարձրաստիճան պաշտոնյաները նախազգուշացրել են թուրք անհատներին, որ նրանք կարող են ենթարկվել ազատազրկման, տուգանքների, արտահանման արտոնությունների կորստի և այլ տույժերի, եթե ծառայություններ մատուցեն դեպի Ռուսաստան, Բելառուս և հակառակ ուղղությամբ թռչող ԱՄՆ-ի արտադրության ինքնաթիռները՝ խախտելով նախորդ տարի ներդրված արտահանման վերահսկողության պայմանները։ Նշվում է, որ անցյալ տարվա դեկտեմբերին Վաշինգտոնի դիրքորոշումը թուրք պաշտոնյաներին է փոխանցել ԱՄՆ առևտրի նախարարի օգնական Թեա Ռոզման Քենդլերը։
Տանկերի մատակարարում Ուկրաինա
Կանադայի կառավարությունն Ուկրաինային կփոխանցի չորս «Leopard 2» տանկ։ Այս մասին լրագրողներին ասել է Կանադայի ազգային պաշտպանության նախարար Անիտա Անանդը։ «Այսօր ես հայտարարում եմ, որ Կանադան առաջիկա շաբաթների ընթացքում 4 «Leopard 2» տանկ կմատակարարի Ուկրաինային»,- ասել է նա։ Անանդը հավելել է, որ Օտտավան նաև կանադացի հրահանգիչներ կտրամադրի ուկրաինացի զինվորականներին՝ այդ տեխնիկայի կիրառման ուսուցման համար։
Ուկրաինային տանկեր տրամադրելու որոշման մասին է հայտնել նաև ԱՄՆ նախագահ Ջո Բայդենը։ Խոսքը վերաբերվում է ամերիկյան արտադրության Abrams տանկերի գումարտակ ուղարկելուն։ Սակայն ԱՄՆ պետքարտուղարի քաղաքական հարցերով տեղակալ Վիկտորիա Նուլանդը նախօրեին հայտարարել է, որ Միացյալ Նահանգները չեն հասցնի մինչև գարուն Abrams տանկերն ուղարկել Ուկրաինա։ «Abrams-ը, ինչպես գիտեք, շատ բարդ տանկ է և զգալի նախապատրաստվածություն է պահանջում։ Թեև մենք երեկ հաստատել ենք դրանց ուղարկումը, սակայն որոշակի ժամանակ կպահանջվի դրանք մարտի դաշտ հասցնելու համար։ Նրանք այնտեղ չեն լինի գարնանային հարձակման դրությամբ»,- ասել է Նուլանդը։
