Apple ընկերության խոշորագույն մատակարար Foxconn ընկերությունը հայտարարել է, որ փետրվարին 2022 թվականի նույն ժամանակահատվածի համեմատ իր եկամուտները նվազել են 11,65%-ով: Ընկերությունը նշել է, որ պատճառը պահանջարկի թուլացումն է:
Որքան էլ խոսքը պահանջարկի թուլացման մասին է, այնուամենայնիվ, ընկերության փետրվար ամսվա եկամուտը կազմել է ավելի քան 13 միլիարդ դոլար, ինչը ևս ահռելի գումար է արտադրողի համար:
Վաճառքներին նոր տեմպ հաղորդելու համար Foxconn-ը սկսել է ուսումնասիել խոշոր արտադրության հնարավորությունները Հնդկաստանում: Ըստ BBC-ի տվյալների, ընկերությունը նախատեսում է մինչև 1 մլրդ դոլար ներդնել Բանգալորում: Նաև տեղեկություններ կան, որ Foxconn-ի ներդրումը Հնդկաստանում կստեղծի մոտ 100,000 աշխատատեղ:
Միաժամանակ Foxconn–ն աշխատում է Չինաստանի Չժենչժոու քաղաքում գտնվող՝ աշխարհում iPhone-ի ամենամեծ գործարանում աշխատանքներն ամբողջությամբ բնականոն հուն վերադարձնելու ուղղությամբ, որը սահմանափակվել էր Covid-ի պատճառով:
«Ելնելով առաջին երկու ամիսների եկամուտների կատարողականից՝ 2023 թվականի առաջին եռամսյակի հեռանկարը մոտավորապես համապատասխանում է շուկայի ակնկալիքներին», – նշել է Foxconn-ը:
