ԱՄՆ-ն և ՌԴ-ն ՄԱԿ-ում համատեղ հասել են ինքնավար սպառազինությունների վերահսկողության մեղմացմանը
Կարդացեք նաև
Միավորված ազգերի կազմակերպության շրջանակներում ընթացող բանակցություններում ԱՄՆ-ն և Ռուսաստանի Դաշնությունը համատեղ հանդես են եկել արհեստական բանականությամբ (ԱԲ) կառավարվող ինքնավար սպառազինությունների նկատմամբ վերահսկողության մեղմացման օգտին։ Ինչպես հայտնում է ամերիկյան պարբերականը՝ վկայակոչելով Washington Post-ի հրապարակումը, Շվեյցարիայում ՄԱԿ-ի հովանու ներքո սեպտեմբերին անցկացված քննարկումների վերջին օրը երկու տերությունները միավորել են ջանքերը և կարողացել են էապես թուլացնել քննարկվող անվտանգության միջոցառումները։
Ամերիկացի և ռուս դիվանագետները համատեղ վերամշակել են բանակցվող փաստաթուղթը՝ դրանից դուրս թողնելով ռազմական ոլորտում արհեստական բանականության կիրառմանը վերաբերող մի շարք առանցքային դրույթներ։ Մասնավորապես, տեքստից հանվել է այն պարտադիր պահանջը, ըստ որի՝ մարդիկ նախքան հարված հասցնելը պետք է ստուգեն ԱԲ համակարգերի կողմից նույնականացված թիրախները։ Բացի այդ, փաստաթղթից հեռացվել են նաև ԱԲ սպառազինությունների կիրառման ժամանակ էթիկական նկատառումները հաշվի առնելու վերաբերյալ բոլոր հղումները։
Washington Post-ի փոխանցմամբ՝ երբ նիստն անցել է դռնփակ ռեժիմի, Վաշինգտոնի և Մոսկվայի ներկայացուցիչները ներգրավել են իրավաբանների մեծ թիմեր՝ ցանկալի փոփոխություններն արագորեն առաջ մղելու համար։ Այլ երկրների փոքրաթիվ պատվիրակությունները պարզապես ապշած են եղել այն արագությունից, որով երկու գերտերությունները կատարել են այդ փոփոխությունները։
Հետևեք մեզ նաև Telegram-ում