Ադրբեջանի ազգային արժույթը կրկին անկում է ապրել
Նմանատիպ
Ադրբեջանի ազգային արժույթը` մանաթը, կապված նավթի գների անկման հետ, սըրընթաց կերպով անկում է ապրում:
Այս մասին, ինչպես փոխանցում է «Արմենպրես»-ը, հայտնում է ադրբեջանական fins.az-ը:
Ադրբեջանի կենտրոնական բանկի հաղորդմամբ, դեկտեմբերի 7-ին դոլար-մանաթ պաշտոնական փոխարժեքը կկազմի 1,7369 մանաթ: Դեկտեմբերի 6-ին դոլար-մանաթ պաշտոնական փոխարժեքը կազմել է 1,7339 մանաթ:
Դոլարի պաշտոնական փոխարժեքի սահմանմանը զուգահեռ Ադրբեջանի սև շուկայում դոլար-մանաթ փոխարժեքը հասնում է ռեկորդային ցուցանիշների: Ադրբեջանի սև շուկայում դոլար-մանաթ փոխարժեքը անցել է 1,8 մանաթը: Երկրում գործող պաշտոնական փոխարժեքի ու սև շուկայում առկա փոխարժեքի միջև պահպանվում է 5-6 տոկոսի տարբերություն:
Ադրբեջանի փորձագիտական շրջանակներն ակնկալում են մինչև տարեվերջ դոլարի փոխարժեքի շարունակական բարձրացումներ:
Կապված ադրբեջանական նավթի էժանացման հետ` անկում է ապրում նաև Ադրբեջանի ազգային արժույթը` մանաթը, քանի որ այդ երկրում գործում է լողացող փոխարժեքի քաղաքականությունը, ինչը հարմարեցվում է նավթի գներին:
Հետևեք մեզ նաև Telegram-ում