Sport
BlogԿանադայի Հայ դատը Թուրքիային հորդորել է վերջ տալ տնտեսական շանտաժի քաղաքականությանը
Հայ դատի հանձնախումբը արձագանքել է Կանադայում Թուրքիայի դեսպան Թունջայ Բաբալիի այն հայտարարությանը, թե հյուսիսամերիկյան այդ երկրի կողմից Հայոց ցեղասպանության ճանաչման փաստը կարող է խոչընդոտել թուրք-կանադական առևտրատնտեսական հարաբերությունների զարգացումը:
ԱՄՆ-ում հրատարակվող Asbarez պարբերականըհաղորդում է, որ Կանադայի Հայ դատի հանձնախումբը Բաբալիի հայտարարության առնչությամբ հաղորդագրություն է տարածել, որում Անկարային կոչ է արել վերջ տալ Հայոց ցեղասպանությունը ժխտելու և տնտեսական նենգաշորթման քաղաքականությանը: «Թուրքիան հասկացավ, որ միայն քարոզչությունը և լոբբին բավարար չեն, որ ստիպեն Կանադայի նման երկրին, որը հիմնված է մարդու իրավունքները հարգելու սկզբունքի վրա, մոռանալ մարդկության դեմ կատարված դաժան հանցագործությունը, ուստի այժմ նրանք դիմում են կաշառակերության, շորթման և շանտաժի օգնությանը»,- հայտարարել է Կանադայի Հայ դատի հանձնախմբի նախագահ Ժիրայր Բասմաջյանը:
«Կանադայի Հայ դատի հանձնախումբը վստահ է, որ Օտտավան պատմությունը չի աղավաղի՝ օտարերկրյա մի կառավարության ցանկությանը հարմարեցնելու համար»,-ասված է հայտարարության մեջ:
Հանձնախումբը նաև առանձնահատուկ շնորհակալություն է հայտնել Մարդու իրավունքների կանադական թանգարանի ղեկավարությանը, որը անմիջապես արձագանքել էր Բաբալիի հայտարարությանը՝ նշելով, որ իրենք շարունակելու են 1915թ-ի դեպքերը որակել որպես ցեղասպանություն: «Օսմանյան կայսրության կողմից հայերի կոտորածը Ցեղասպանություն որակելը միգուցեև վնասի Կանադայի և Թուրքիայի միջև առևտրային հարաբերությունների զարգացմանը, սակայն Մարդու իրավունքների կանադական թանգարանը չի պատրաստվում 1,5 մլն մարդու ջարդը որակել այլ կերպ, քան ցեղասպանություն»,-ասված էր թանգարանի տարծած հայտարարությունում:
«Կանադահայ համայնքը շնորհակալություն է հայտնում Մարդու իրավունքների կանադական թանգարանին, որ անմիջապես հասկացրեց Թունջայ Բաբալիին, որ Թուրքիայի տնտեսական շանտաժը չի կարող փոխել Հայոց ցեղասպանության հարցի առնչությամբ Կանադայի քաղաքականությունը: Կանադացիները հստակ հասկացրին, թե ճշմարտությունը չի վաճառվում»,-ասված է Կանադայի Հայ դատի հանձնախմբի հայտարարությունում:
