Նախագահին առաջարկել ենք չստորագրել Օնիկ Գասպարյանի ազատման դիմումը. ՏԵՍԱՆՅՈՒԹ
Նմանատիպ
ՀՀ նախագահին խնդրել ենք, որպեսզի իր լիազորությունների շրջանակներում հանգուցալուծի մեր երկրում ստեղծված իրավիճակը: Այս մասին լրագրողների հետ զրույցում ասաց «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը:
«ՀՀ նախագահին ներկայացրել ենք մեր տեսակետը և խնդրել՝ որպես ՀՀ Սահմանադրության երաշխավոր, իր լիազորությունների շրջանակներում հանգուցալուծի մեր երկրում ստեղծված իրավիճակը: Արձանագրեցինք՝ առաջնահերթ է մեր պետական շահը: Նախագահը դեռ ունի հանդիպումներ և ավարտին մեզ կներկայացնի հստակ պատասխան»,- ասաց Վանեցյանը:
Այսօր ՀՀ նախագահ Արմեն Սարգսյանը հանդիպել է «Հայրենիքի փրկության շարժման» 4 ներկայացուցիչների՝ Վազգեն Մանուկյանի, ՀՅԴ ներկայացուցիչ Արծվիկ Մինասյանի, Արթուր Վանեցյանի և ՀՀԿ-ից ներկայացուցիչ Վահրամ Բաղդասարյանի հետ:
Նախագահը հանդիպման մասնակիցներին տեղեկացրել է՝ այսօր հանդիպում է ունենալու գլխավոր շտաբի պետ Օնիկ Գասպարյանի հետ:
«Այսօր մեզ տեղեկացրել է՝ հանդիպելու է Օնիկ Գասպարյանի հետ, նաև Զինված ուժերի գլխավոր շտաբի ղեկավար կազմի հետ և անձամբ նրանցից լսելու է հայտարարության պահանջների մասին, բայց կա մի կոնսենսուս՝ Հայաստանը գտնվում է աննորմալ և ծայրահեղ ծանր կարգավիճակում»,- տեղեկացրեց Արթուր Վանեցյանը:
Նա հավելեց՝ իրենց դիրքորոշումը հստակ է, նախագահին առաջարկում են չստորագրել Օնիկ Գասպարյանի ազատման դիմումը: «Մեր դիրքորոշումը հստակ է, մենք առաջարկում ենք նախագահին չստորագրել Օնիկ Գասպարյանի ազատման դիմումը, դիմումը պետք է վերադարձնել Կառավարություն, որից հետո, եթե Կառավարությունը կրկին կդիմի նույն միջնորդությամբ, այդ դեպքում նախագահն իրավասու է այն ուղարկել ՍԴ՝ սահմանադրականությունը վիճարկելու համար»,– հավելեց նա:
Հիշեցնենք՝ երեկ Նիկոլ Փաշինյանն իր ֆեյսբուքյան ուղիղ եթերի ժամանակ հայտարարել էր, որ ԳՇ պետ Օնիկ Գասպարյանին ազատում է աշխատանքից, իսկ այսօր «Հանուն հայրենիքի փրկության շարժման» անդամները հանդիպել են ՀՀ նախագահի հետ և բարձրաձայնել այդ հարցը՝ առաջարկելով չստորագրել այդ դիմումը։
Հետևեք մեզ նաև Telegram-ում