Գործելու է միայն 1 ճանապարհ․ դա Լաչինի միջանցքն է․ Իշխանյան

Արցախի իշխանությունների կողմից կա հստակ որոշում՝ փակ պահել Ակնա– Ստեփանակերտ ճանապարհը։ Այս մասին լրագրողների հետ զրույցում ասել է Արցախի ԱԺ նախագահ Դավիթ Իշխանյանը։

«Վերջին շաբաթներին Արցախի իշխանությունների քննարկումները հանգել են միայն այն փաստին, որ այդ ճանապարհի գործարկումն անընդունելի է։ Անընդունելի է մի շարք պատճառներով` մեկը այն է, որ իբրև միջանցք մենք ունենք մեկ ճանապարհ, որը կոչվում է Լաչինի միջանցք, ու անխափան երթևեկը այդ ճանապարով պետք է վերականգնվի, դա ամրագրված է նաև 2020 թ–ի նոյեմբերի 9-ի փաստաթղթով»,– ընդգծել է նա։

Նշենք, որ երեկ ադրբեջանական կողմը 40 տոննա ալյուր էր փորձում ուղարկել Ստեփանակերտ։ Արցախի Ասկերանի շրջանի բնակիչները դեպի Աղդամ տանող ճանապարհի այս կողմում ցույց էին իրականացնում՝ նշելով, որ ադրբեջանական կողմի՝ Աղդամով ուղարկած ադրբեջանական բեռն իրենք չեն ուզում։ Բեռները մինչև հիմա Աղդամի անցակետի մոտ են։

Արցախի նախագահի մամուլի խոսնակ Լուսինե Ավանեսյանն էլ երեկ հայտարարել էր, որ արցախյան կողմի հետ որևէ պայմանավորվածություն չի եղել:

Դավիթ Իշխանյանը վստահ է, որ Աղդամի ճանապարհով փորձելով հումանիտար բեռ հասցնել Արցախ` Ադրբեջանը հերթական սադրիչ քայլն է անում և փորձում է աշխարհին ցույց տալ, որ իբրև ամեն ինչ անում են Արցախի ժողովրդի կարիքները ապահովելու համար։

«Կա ևս մեկ նրբություն. Ադրբեջանը իր «Կարմիր մահիկի» միջոցով փորձում է Արցախից դուրս մղել «Կարմիր խաչի» գրասենյակը, իսկ միջազգային այդ կառույցի ներկայությունը մեզ համար առավելություն է»,– նշել է Իշխանյանը։

Հավելենք, որ Արցախի նախագահ Արայիկ Հարությունյանն էլ էր ավելի վաղ հայտարարել, որ գործելու է միայն մեկ ճանապարհ, ու դա Լաչինի միջանցքն է։