Ադրբեջանը ընդլայնում է Բրիտանիայի հետ համագործակցությունը

Ադրբեջանը ցանկանում է ընդլայնել ռազմական համագործակցությունը Մեծ Բրիտանիայի հետ և այդ ուղղությամբ բանակցություններ է վարում բրիտանական կողմի հետ։ Այս մասին տեղեկացնում են ադրբեջանական լրատվամիջոցները՝ հղում անելով պաշտպանության նախարարությանը։

Այսօր Բաքվում Ադրբեջանի և  Մեծ Բրիտանիայի պաշտպանության նախարարությունների միջև  շտաբային բանակցություններ են անցկացվել։ Ռազմական համագործակցությունն ընդլայնելու հեռանկարներից բացի, առաջիկայում նախատեսված  զորավարժությունների նախապատրաստման հետ կապված հարցեր են քննարկվել։

Ադրբեջանական կողմը հույս է հայտնել, թե «ռազմական ոլորտում Մեծ Բրիտանիայի հետ համագործակցությունը  կշարունակի  փոխշահավետ հունով ընթանալ»։

Բրիտանիայի պաշտպանության նախարարության ներկայացուցիչները նաև ադրբեջանական զինուժի զորամասերից մեկն են այցելել՝ ծանոթանալու իրենց կողմից ֆինանսավորված ու կազմակերպված վերապատրաստման դասընթացների արդյունքներին։