Կիեւում բերման են ենթարկվել «ֆինանսական մայդանի» 12 մասնակիցներ
Նմանատիպ
Կիեւում «ֆինանսական մայդանի» մասնակիցների ձերբակալություններ են սկսվել, որոնք հանրահավաք են անցկացնում Ուկրաինայի Գերագույն ռադայի մոտ: Այդ մասին, ինչպես տեղեկացնում է «Արմենպրես»-ը, մայիսի 22-ին հաղորդել է «Ուկրաինսկայա պրավդա»-ն՝ հղում անելով բողոքի ակցիայի ակտիվիստներին:
Հրատարակության տեղեկատվության համաձայն՝ միլիցիայի բաժանմունք է բերվել 12 մարդ: Ինչպես պարզաբանել են իրավապահ մարմինների աշխատակիցները, հանրահավաքի մասնակիցները «ձերբակալված են ստուգման համար»:
Շուրջ 40 մարդ որոշել է գիշերն անցկացնել Գերագույն ռադայի շենքի մոտ: Բողոքավորները տուփերից ու վերմակներից տեղեր են սարքել գիշերելու համար, հաղորդում է «Ինտերֆաքս-Ուկրաինա»-ն: Կոմունալ ծառայությունները ձեռնամուխ են եղել այրված անվադողների մնացորդների հավաքմանը, ընդ որում բողոքի ակցիայի մասնակիցները թույլ չեն տվել տանել «ֆինանսական մայդանի» դրոշները եւ մետաղական տակառները:
Մայիսի 21-ին հանրահավաքի մասնակիցները փորձել են ներխուժել Գերագույն ռադայի շենք: Նրանցից ոմանք կենտրոնական մուտքի ուղղությամբ նետում էին փայտեր ու դատարկ շշեր: Բացի այդ, պիկետի մասնակիցները անվադողեր են այրել: Նրանց եւ իրավապահ մարմինների ներկայացուցիչների միջեւ ընդհարումներ են տեղի ունեցել: Ինչպես հայտնել է Ուկրաինայի ՆԳ նախարարության մամուլի ծառայությունը, բախումների ընթացքում վերքեր են ստացել «ֆինանսական մայդանի» երկու ներկայացուցիչներ, հոսպիտալացվել են չորս միլիցիոներներ:
Ուկրաինայի խորհրդարանի շենքի մոտ ակցիան սկսվել է մայիսի 21-ի ցերեկը: Դրա մասնակիցները պահանջում են ավանդատուներին վերադարձնել խնդրահարույց բանկերի միջոցները, ինչպես նաեւ հանդես են գալիս ազգային բանկի ղեկավար Վալերիա Գոնտարեւայի պաշտոնաթողության օգտին: Գերագույն ռադայի պատերի մոտ, ինչպես նաեւ Ուկրաինայի ազգային բանկի մերձակայքում պիկետներ են անցկացվում արդեն մի քանի ամիս:
Հետևեք մեզ նաև Telegram-ում