Գյումրիում երկրաշարժի հետևանքով անօթևան մնացած 26 ընտանիք ստացավ բնակարանի գնման վկայագիր

Գյումրիում երկրաշարժի հետևանքով անօթևան մնացած 26 ընտանիք ստացավ բնակարանի գնման վկայագիր: 29 տարի տնակներում ապրելուց հետո սա վերջապես հնարավորություն է սեփական քարից տունը կամ բնակարանն ունենալու: Ծրագրի այս փուլով, որն ընդհանուր ներառում է 83 շահառու ընտանիք, պետությունը Գյումրիում երկրաշարժից անօթևան ընտանիքների խնդիրը լուծված է համարում: 

Ծրագիրը ավարտելու ու շահառու ճանաչված վերջին ընտանիքներին «Բնակարանի գնման վկայագիր» տալու համար ՀՀ պետական բյուջեից տրամադրվել է 546 մլն դրամ գումար: Ինչպես տեղեկացնում է «Արմենպրես»-ը, 83 ընտանիքից 18-ը գնելու է 1 սենյականոց, 53-ը՝ 2 և 12-ը՝ 3 սենյականոց բնակարան: Վկայագրի արժեքը կախված է սենյակների քանակից. 1 սենյակի շահառուներին տրամադրվում է 4 մլն 923 հազար դրամ, 2 սենյականոց՝ 6 մլն 17 հազար և 3 սենյակի շահառուներին՝ 7 մլն 111 հազար դրամ գումար:

Շահառուները վկայագրով հնարավորություն ունեն բնակարան ձեռքբերելու հանրապետության տարբեր մարզերում և ԼՂՀ-ում:

Բնակարանի գնման վկայագիր պետական ծրագիրը, որի նպատակը Գյումրիում անօթևանության խնդրի լուծումն է, նպաստում է նաև քաղաքում մեկ այլ՝ քաղաքը տնակներից ազատելու խնդրի լուծմանը: Ըստ ծրագրի՝ բնակիչը, առք ու վաճառքի պայմանագիրը կնքելուց հետո ստանում է վկայագիր եւ հատկացված գումարի միայն 60 տոկոսը: Գումարի մնացած՝ 40 տոկոսը, տրվում է, երբ ընտանիքները ներկայացնեն տնակների ապամոնտաժման վերաբերյալ փաստաթուղթ:

Սրանով թեև այս փուլի շահառու ճանաչված անօթևան ընտանիքների խնդիրը կլուծվի, սակայն Գյումրիում այսքանով անօթևանների խնդիրը լուծված չի կարող համարվել: Սեփական բնակելի տներ կորցրած 98 ընտանիք չի օգտվում այս ծրագրից: Նրանք դեռևս մնում են անոթաբանության ցուցակում:

Դեռևս լուծված չէ նաև մարզի 19 գյուղական համայնքների 119 անօթևան ընտանիքների խնդիրը: