Շրջակա միջավայրի մոնիթորինգ իրականացնելիս իրավիճակը ֆիքսում ենք ու ոչինչ չենք անում
Նմանատիպ
Կառավարության նիստում վարչապետ Կարեն Կարապետյանն անդրադարձավ շրջակա միջավայրի մոնիթորինգի իրականացմանը: «Բնապահպանության նախարարության կողմից եռամսյակային կտրվածքով ներկայացվում են շրջակա միջավայրի վիճակի վերաբերյալ հետազոտություններ, որոնք պարունակում են հանրապետության տարբեր բնակավայրերի մթնոլորտային օդի, հողերի և ջրերի աղտոտվածության, սահմանաչափերի գերազանցման վերաբերյալ տեղեկություններ: Միաժամանակ, նշված հետազոտությունները չեն պարունակում արձանագրված խնդիրների, պատճառների և դրանց վերացման վերաբերյալ վերլուծություններ, իսկ օրենսդրությամբ լիարժեք սահմանված չեն արձանագրված խնդիրների նվազեցման կամ լուծման պարտադիր պայմաններ և գործուն մեխանիզմներ»,- ասաց Կարեն Կարապետյանը։
Ելնելով վերոնշյալից՝ վարչապետը Բնապահպանության նախարարին հանձնարարեց 1-ամսյա ժամկետում ապահովել շրջակա միջավայրի մոնիթորինգի արդյունքներում արձանագրված խնդիրների և դրանց հնարավոր լուծումների վերաբերյալ վերլուծության իրականացումը, ինչպես նաև կառավարության աշխատակազմ ներկայացնել դրանց կատարումը ապահովող գործիքակազմի վերաբերյալ առաջարկություններ։ Ըստ անհրաժեշտության՝ հարցը քննարկել շահագրգիռ այլ մարմինների հետ։
Տարածքային կառավարման և զարգացման նախարարին հանձնարարվեց ձեռնարկել միջոցներ համայնքների կողմից Բնապահպանության նախարարության շրջակա միջավայրի մոնիթորինգի արդյունքում վերհանված խնդիրների նվազեցման և բնապահպանական վիճակի բարելավման ուղղությամբ։
«Մենք Բնապահպանության նախարարության հաշվետվությունը լսելու ժամանակ արձանագրել ենք, որ գոյություն ունեն համայնքներ, որտեղ տարեցտարի նախարարությունը նույն եզրակացությունն է անում, բայց այդ նյութից հասկանալի չէ՝ համայնքապետն ինչ պետք է անի, հասկանալի չէ պատճառը որտեղից է և չգիտեմ ինչ բովանդակություն է կրում: Այսինքն՝ մենք ֆիքսում ենք, ոչ մի բան չենք անում, հաջորդ տարին գալիս է, կրկին ֆիքսում ենք: Հանձնարարականի երկրորդ կետի կատարման համար խիստ անհրաժեշտ է, որպեսզի առաջին կետը լինի հաշվելի, հասկանալի: Այդ իսկ պատճառով, պարոն Մինասյան, հստակ ձևակերպում ենք խնդիրը»,- դիմելով Բնապահպանության նախարար Արծվիկ Մինասյանին՝ ասաց Կարեն Կարապետյանը:
Հետևեք մեզ նաև Telegram-ում