Մադրիդի «Ռեալի» խորվաթ կիսապաշտպան Լուկա Մոդրիչի վնասվածքը շատ ավելի լուրջ է, քան ենթադրվում էր։ Ինչպես հաղորդում է Խորվաթիայի ֆուտբոլային միության պաշտոնական կայքը, ֆուտբոլիստի ապաքինման համար երեք ամիս կպահանջվի։
29-ամյա կիսապաշտպանը վնասվածք էր ստացել Եվրոպայի առաջնության ընտրական փուլի՝ Իտալիայի հավաքականի դեմ խաղում և 28-րդ րոպեին փոխարինվել։
Երեկ Մոդրիչը բուժզննում է անցել, որը ախտորոշել է ձախ ազդրի ջլի կտրվածք։ Վիրահատության կարիք չի լինի, սակայն Մոդրիչը ստիպված կլինի բաց թողնել Աշխարհի ակումբային առաջնությունը։
Հիշեցնենք, որ ավելի վաղ ենթադրվում էր, որ ֆուտբոլիստը մեկ ամսից դաշտ կվերադառնա։
