Իրանի արտաքին գործերի նախարարության խոսնակ Էսմայիլ Բաղային հայտարարել է, որ Միացյալ Նահանգները պետք է երաշխավորի Իսրայելի կողմից ձեռք բերված պայմանավորվածությունների պահպանումը։
Նրա խոսքով՝ համաձայնագրի ցանկացած խախտում, այդ թվում՝ Իսրայելի կողմից, կարող է հանգեցնել Իրանի կողմից դրա կատարման կասեցմանը։
Բաղային ընդգծել է, որ համաձայնագրի տեքստում լիովին հաշվի են առնվել Լիբանանի տարածքային ամբողջականությունն ու ազգային ինքնիշխանությունը։
Խոսնակի փոխանցմամբ՝ Ժնևում նախատեսված հանդիպումից առաջ իրանական կողմը կայցելի տարածաշրջանի մի շարք երկրներ։ Նա նաև նշել է, որ համաձայնագրի ստորագրման ձևաչափի վերաբերյալ վերջնական որոշումը կընդունվի այսօր կամ վաղը։
«Համաձայնագրի դիվանագիտական բաղադրիչների մանրամասները շուտով կհրապարակվեն։ Հուշագրի ստորագրման մեխանիզմն ու ընթացակարգը նույնպես կորոշվեն մոտ օրերս և պաշտոնապես կհայտարարվեն», — ասել է Բաղային։
Անդրադառնալով ԱՄՆ նախագահի հայտարարությանը՝ Իրանից հարստացված միջուկային նյութերի հնարավոր արտահանման վերաբերյալ, Իրանի ԱԳՆ խոսնակը հայտարարել է. «Նրանք արդեն մեկ անգամ փորձել են և տեսել արդյունքը։ Ցանկանո՞ւմ են կրկին փորձել»։
