Իրաքը կսահմանափակի Իրանի հասանելիությունը ԱՄՆ դոլարին․ WSJ

Իրաքը համաձայնել է խստացնել ֆինանսական վերահսկողությունը՝ Իրանի կողմից աջակցվող զինված խմբավորումների համար փակելով ամերիկյան դոլարին հասանելիության ուղիները։ Այդ մասին հայտնում է The Wall Street Journal-ը։

Պարբերականի տեղեկություններով՝ համաձայնությունը ձեռք է բերվել այն բանից հետո, երբ ԱՄՆ-ն չորս ամսով դադարեցրել էր Իրաքին կանխիկ դոլարի մատակարարումները։

Նշվում է, որ փոխարենը Վաշինգտոնը վերսկսել է միլիարդավոր դոլարների կանխիկ մատակարարումը, որը կարևոր նշանակություն ունի Իրաքի տնտեսության բնականոն գործունեության պահպանման համար։

Համաձայնագրի շրջանակում Իրաքը պարտավորվել է խստորեն վերահսկել արժույթի փոխանակման կետերի գործունեությունը և աշխատավարձերի վճարման համակարգերը, որոնց միջոցով, ըստ ԱՄՆ-ի, Իրանի աջակցությունը վայելող զինված խմբավորումները շրջանցել են ամերիկյան պատժամիջոցները և ձեռք բերել ԱՄՆ դոլար։

Հետևեք մեզ նաև Telegram-ում