Դորտմունդի «Բորուսսիայի» կիսապաշտպան Կևին Գրոսկրոյտցը Instagram-ի իր պաշտոնական էջում կատարած գրառմամբ դիմել է թիմի երկրպագուներին:
«Երկրպագունե՛ր, ֆանատնե՛ր, ընկերնե՛ր, շատ բան է ասվել և գրվել: Ես` որպես ֆուտբոլիստ, չպետք է որևէ բան ասեմ կամ գրեմ, պետք է լռեմ և խնդիրները լուծեմ խաղադաշատում: Գիտեմ` դա այդպես է, բայց ամեն դեպքում, ցանկանում եմ արտահայտվել:
Ինձ և ակումբի համար ներկայիս դրությունը միանգամային նոր է, բայց մենք կարող ենք հույսներս միայն մեզ վրա դնել: Ես հասկանում եմ ձեր արձագանքը, թեպետ դա ցավեցնում է իմ սիրտը: Մի կողմից տրիբունաների իմ ընկերներն են, ովքեր բարկացած են, հիասթափված, մյուս կողմից` թիմակիցներս, ովքեր զգում են նույնը, բայց մեղավորությունն մերն է: Տրիբունաների արձագանքը հասկանալի է:
Ամեն դեպքում, մենք չպետք է թույլ տանք այլ ակումբների սխալները և չպետք է մասնատվենք: Պետք չէ երես թեքել ֆուտբոլիստներից կամ վիրավորել նրանց: Մենք ընկել ենք որպես թիմ և պետք է բարձրանանք միասին: Հավատացեք` չեմ ցանկանում գունազարդել իրավիճակը: Սա «Բորուսսիայի» համար բարդ իրավիճակ է, և դուք ակումբին պետք է տաք ամեն ինչ:
Կանենք այն ամենը, ինչ կարող ենք, սակայն երկրպագուների կարիքն ունենք: Հակառակ դեպքում` կհետևենք այն ակումբների օրինակին, որոնք երբեք չեն մտածել, որ կհայտնվեն անդունդում և արդյունքում դուրս չեն եկել այնտեղից:
Կներեք երկար տեքստի համար: Սա այն ամենն է, ինչ ես այժմ զգում եմ: Այս ամենն իմ սրտից եմ ասում: Մի բան երբեք չի փոխվի` Դորտմունդի «Բորուսսիան» երբեք չի կործանվի»,-գրել է Գրոսկրոյտցը:
Հիշեցնենք, որ Գերմանիայի առաջնության 13-րդ տուրից հետո «Բորուսսիան» ունի 11 միավոր և եզրափակում է մրցաշարային աղյուսակը:
