Նավթի գները բարձրացել են. ԱՄՆ-Իրան բանակցությունների մտահոգությունները ազդել են շուկայի վրա

Նավթի միջազգային գները չորեքշաբթի օրը բարձրացել են՝ արձանագրելով վերջին ամիսների ամենամեծ աճը։ Գնային աճին նպաստել են ԱՄՆ-ի և Իրանի միջև բանակցությունների ձգձգումը, ինչպես նաև վառելիքի շուկայում պահպանվող առաջարկի սահմանափակումները։

Brent տեսակի նավթի նոյեմբերյան ֆյուչերսների գինը բարձրացել է՝ հասնելով մեկ բարելի դիմաց 103,19 դոլարի, իսկ դեկտեմբերյան պայմանագրերի գինն աճել է մինչև 97,78 դոլար։ Ամերիկյան WTI (West Texas Intermediate) տեսակի նավթի գինն աճել է՝ հասնելով 90,57 դոլարի։

Շուկայի վրա շարունակում է ազդեցություն ունենալ քաղաքական անորոշությունը։ Չնայած Կատարի միջնորդական ջանքերին, ԱՄՆ նախագահ Դոնալդ Թրամփը հերքել է տեղեկությունները, թե Վաշինգտոնը պատրաստ է թուլացնել Իրանի նկատմամբ սահմանված պատժամիջոցները կամ ապաբլոկավորել ֆինանսական միջոցները՝ միջուկային ծրագրի վերաբերյալ զիջումների դիմաց։

Միևնույն ժամանակ, Մերձավոր Արևելքից նավթի մատակարարումները աստիճանաբար վերականգնվում են։ Սաուդյան Արաբիան վերսկսել է նավթատարների բեռնումը Կարմիր ծովի Յանբու նավահանգստում։ Goldman Sachs-ի գնահատմամբ՝ Պարսից ծոցի երկրներից նավթի արտահանման ծավալները վերջին շաբաթվա ընթացքում հասել են օրական 23,3 միլիոն բարելի։

OPEC+ երկրների սպասվող հանդիպմանն ընդառաջ, ըստ աղբյուրների, նախատեսվում է նոյեմբերի համար արտադրության ծավալների նույն մակարդակը պահպանել։

Հետևեք մեզ նաև Telegram-ում