Իդլիբում զոհվել են սիրիական բանակի շուրջ 100 զինվորներ

Իդլիբի մարզի Ուադի ադ Դեյֆ ռազմակետի համար երկու օր շարունակվող արյունալի բախումների հետևանքով սպանվել են շուրջ 100 սիրիացի զինվորներ և 80 իսլամիստներ: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, այս մասին հայտարարել է Մարդու իրավունքների պաշտպանության մոնիթորինգի կենտրոնը: Սիրիական ուժերը մի քանի անգամ հաջողությամբ հետ էին մղել իսլամիստների հարձակումները ռազմակետի վրա, որը մոտ 2 տարի շարունակ շրջափակման մեջ էր գտնվում իսլամիստների կողմից: Սիրիական աղբյուրները դեռ տեղեկություններ չեն հրապարակել այս մասին, միայն տեղեկացրել են, որ Իդլիբի մարզում սիրիական բանակը տասնյակ ահաբեկիչների է ոչնչացրել:

Ավելի վաղ տեղեկություններ էին ստացվել, որ սիրիական բանակի հետ թեժ բախումներից հետո «Ջաբհա ան Նուսրա» իսլամիստական խմբավորումը հսկողություն է հաստատել Սիրիայի հյուսիս-արևմուտքում` Դամասկոս-Հալեպ ճանապարհին գտնվող Իդլիբ մարզի Ուադի ադ Դեյֆ ռազմակետի վրա: Բացի այդ, խմբավորումը հսկողություն է հաստատել Մաարաթ ան Նուման գյուղաքաղաքի մերձակայքում գտնվող տարածքների վրա:

«ՍԱՆԱ» գործակալության տեղեկացմամբ` Հասաքե մարզի Մաֆրակ աս Սիդիկ, Մելբիա և Ում առ Ռահաֆ բնակավայրերում ԻՊ-ի տասնյակ անդամներ են ոչնչացվել, ոչնչացվել են նաև նրանց փոխադրամիջոցները: Դեր Զորի մարզի բնակելի տարածքներում ԻՊ-ի ավելի քան 60 ահաբկիչներ են սպանվել: