Արթուր Ալեքսանյանը՝ Եվրոպայի առաջնության փոխչեմպիոն

Հունահռոմեական ոճի ըմբշամարտի Հայաստանի հավաքականի անդամ, Օլիմպիական խաղերի բրոնզե մեդալակիր, աշխարհի կրկնակի, Եվրոպայի առաջնության եռակի չեմպիոն Արթուր Ալեքսանյանը դարձավ Եվրոպայի առաջնության արծաթե մեդալակիր:

Լատվիայի մայրաքաղաք Ռիգայում ընթացող ըմբշամարտի Եվրոպայի առաջնության եզրափակչում 98 կգ քաշային Արթուր Ալեքսանյանը 0:4 հաշվով պարտվեց սկզբունքային մրցակցին՝ Ռուսաստանը ներկայացնող Նիկիտա Մելնիկովին, և դարձավ Եվրոպայի փոխչեմպիոն։

Հիշեցնենք, որ Ալեքսանյանը պայքարն սկսել էր 1/8 եզրափակչից՝ 8:0 հաշվով հաղթելով Ուկրաինան ներկայացնող Դմիտրի Տիմչենկոյին։ Քառորդ եզրափակչում մեր ըմբիշը 6:2 հաշվով հաղթել էր ավստրիացի Դանիել Գաստլին, իսկ կիսաեզրափակչում նույն հաշվով առավելության էր հասել թուրք Ցենկ Իլդեմի նկատմամբ։

Նշենք, որ Մելնիկովը երկու կարևոր մրցաշարերի եզրափակիչներում (2013 թ. աշխարհի առաջնություն և 2013 թ. Ունիվերսիադա) առավելության է հասել մեր մարզիկի նկատմամբ։ Վերջին պարտությունը Արթուրը կրել էր հենց Մելնիկովից։ Դրանից հետո նա 45 անընդմեջ հաղթանակ էր տարել։