Նախօրեին Գյումրիում հնչած կրակոցներից հետո հանրապետության երկրորդ քաղաքում վախի մթնոլորտ է տիրում: Այդ մասին գրում է «Հայկական ժամանակ» թերթը։
«Գյումրեցիները վստահ են, որ կրակոցներից սպանված Շեկո մականվամբ հայտնի Արտյոմ Կարապետյանի համար վրեժ է լուծվելու: Քաղաքում սպասում են «պատերազմի»:
Ոստիկանությունը փորձում է կանխարգելել հնարավոր արյունահեղությունը, ինչը սակայն, գյումրեցիների կարծիքով, դժվար թե հաջողվի։
Երեկ հայտնի դարձավ, որ ոստիկանական խմբերը ողջ Գյումրիում ավտոմեքենաների խուզարկություններ էին իրականացնում, թեեւ կեսօրից հետո ոստիկանությունը պաշտոնապես հայտարարեց, որ հանցագործությունը բացահայտված է, Գյումրիի նախկին քաղաքապետ Վարդան Ղուկասյանի եղբորորդին՝ Վահե Ղուկասյանը, արդեն ինքնախոստովանական ցուցմունք է տվել: Վերջինս եւս կրակոցների ժամանակ հրազենային վնասվածքներ է ստացած եղել: Վահե Ղուկասյանը միակ ձերբակալվածն է: Նախօրեի գիշերը ոստիկանություն հրավիրված մոտ երկու տասնյակ անձինք, որոնց թվում էր նաեւ Վարդան Ղուկասյանը, ազատ են արձակվել»,- գրում է «Հայկական ժամանակը»։
