«Մանչեսթեր Սիթիի» տպավորիչ հաղթանակը (տեսանյութ)

Պրեմիեր լիգայի 25-րդ տուրում առաջատար «Մանչեսթեր Սիթին» ընդունել է հետնապահ «Վեսթ Բրոմվիչին» ու սպասված հաղթանակ տարել: Արձանագրվել է 3:0 հաշիվը:

19-րդ րոպեին Կևին Դե Բրյունեի լավ փոխանցումից հետո Ֆերնանդինյոն առաջ է մղել «քաղաքայիններին»: Երկրորդ խաղակեսում գոլային փոխանցումներ կատարողի դերը ստանձնել է Ռահիմ Ստերլինգը, ով օգնել է աչքի ընկնել Դե Բրյունեին (68-րդ րոպե) և Սերխիո Ագուերոյին (89):

Պեպ Գվարդիոլայի թիմի համար խաղի միակ բացասական կողմն այն է եղել, որ առաջին կեսում վնասվածքի պատճառով փոխարինվել է Դավիդ Սիլվան:

Այդ հաղթանակի շնորհիվ «Մանչեսթեր Սիթին» վաստակել է 68 միավոր և մոտակա հետապնդող «Մանչեսթեր Յունայթեդի» նկատմամբ առավելությունը կրկին հասցրել է 15 միավորի: «Վեսթ Բրոմվիչը» 20 միավորով շարունակում է եզրափակել մրցաշարային աղյուսակը:

Տեսանյութ