Անգամ անցել են իմ անչափահաս երեխաներին, սկսել են հետևել նրանց, հեռախոսները լսել և այլն. Արթուր Վանեցյան

ԵՐԵՎԱՆ, 11 ՀՈՒՆԻՍԻ, Analitik.am: Ինձ գոնե երկու ամսով ինչ-որ շինծու գործով մեկուսացնելու խնդիր է դրված եղել: Հետագայում իրավապահ համակարգում երկար քննարկումներ է եղել, ինչի արդյունքում հասկացել են, որ չեն կարող օրինական ձևով ինձ որևէ մեղադրանք ներկայացնել: Այդ գաղափարից այս փուլում կարծես թե ետ են քաշվել, սակայն դա ժամանակի հարց է, քանի որ այս իշխանություններից ամեն ինչ սպասելի է: Այս մասին հայտարարել է Արթուր Վանեցյանը:

«Այս իշխանությունները հասել են մի վիճակի, երբ տոտալ շփում են սահմանել ինձ հետ շփվող մարդկանց վրա: Անգամ անցել են իմ անչափահաս երեխաներին, սկսել են հետևել, հեռախոսները լսել և այլն: Այս իշխանությունները հասկանում են, որ արդեն չունեն ժողովրդի աջակցությունը: Նրանք իրենց ստերի արդյունքում կորցրել են հենարանը՝ ժողովուրդը, մարդիկ հասկանում են, որ այսպես շարունակվել չի կարող»,-ասել է նա:

Վանեցյանի խոսքերով, հնարավոր չէ իրեն վախեցնել ձերբակալելով, այլ գործիքներով. «Ես ընտրել եմ մի ճանապարհ, որից մի վայրկյան ետ չեմ կանգնելու: Միասին հասնելու ենք մեր նպատակին, ունենալու ենք երկիր, որի մասին երազել ու պայքարել ենք: Մենք ժամանակ չունենք, կյանքն առաջ է գնում, մենք ուզում ենք ապրել մեր երազած երկրում, մեր երեխաներն ունենան այն երկիրը, որի մասին երազել ենք»: