Իտալիայի հավաքականի գլխավոր մարզիչ Չեզարե Պրանդելլին «Միլանի» հարձակվող Մարիո Բալոտելլիին կոչ է արել ղեկավարել իր զգացմունքները խաղադաշտում:
Հիշեցնենք’ կարգապահական հանձնաժողովը իտալացուն որակազրկել է երեք խաղով’ մրցավարի հասցեին վիրավորական արտահայտություններ կատարելու համար, ու այժմ նա ստիպված է բաց թողնել «Յուվենտուսի» հետ կարևոր հանդիպումը:
-Բալոտելլին միշտ տարբեր սադրանքների է ենթարկվում: Նա պետք է փակի բերանը ու ոչ մի բանի ուշադրություն չդարձնի: Շատ կարևոր է հանգստություն պահպանել: Այս հարցում Մարիոն պետք է առաջընթաց գրանցի:
Ի վերջո, հետագայում նրան ավելի շատ են հրահրելու ու սադրանքների ենթարկելու: Նա պետք է սովորի կառավարել իրեն: Ինչ վերաբերում է «Յուվենտուսի» ու «Միլանի» մրցավեճին, կարծում եմ, այս երկու թիմերը ֆուտբոլասերներին իսկական ֆուտբոլային տոն կպարգևեն: «Յուվեն» մոտ է Սկուդետտոն պաշտպանելուն, իսկ «ռոսսոներին» պայքարում է երրորդ տեղի համար: Մեզ շատ հետաքրքիր խաղ է սպասվում,- ասել է Պրանդելլին Rai Sport-ին տված հարցազրույցում:
