Մադրիդի «Ատլետիկոյի» գլխավոր մարզիչ Դիեգո Սիմեոնեն հերթական անգամ հայտարարել է, որ իր թիմին չի համարում Իսպանիայի առաջնության ֆավորիտ: Առաջնության 22 տուրից հետո մադրիդյան թիմն ունի 57 միավոր և միանձնյա գլխավորում է մրցաշարային աղյուսակը` 3 միավորի առավելություն ունենալով «Բարսելոնայի» և «Ռեալի» նկատմամբ:
«Ես շարունակում եմ մնալ նույն կարծիքին: Կարծում եմ`մենք չենք կարող հաղթել Իսպանիայի առաջնությունում այս մրցաշրջանում: Մեր հիմնական նպատակն է լռելը և աշխատելը, և ոչ ոք ինձ չի ստիպի հավատալ ինչ-որ բանի. ես չեմ հավատում:
Եթե վերջին տասը տարիների ընթացքում մեր գրանցած արդյունքներին նայենք, ապա կտեսնենք` երրորդ հորիզոնականից բարձր տեղ չենք զբաղեցրել` առաջատարներից հետ մնալով 15, 20 կամ 30 միավորով: Հենց այդ պատճառով ես կարծում եմ, որ չենք կարող չեմպիոն դառնալ»,-Սիմեոնեի խոսքերը մեջբերել է «Football Espana»-ն:
