Բանակի և զինված ուժերի ուղերձն այն է, որ արտատարածաշրջանային ուժերը պետք է որքան հնարավոր է շուտ հեռանան տարածաշրջանից: Այս մասին Բանակի օրվան նվիրված տոնակատարությունների ընթացքում հայտարարել է Իրանի Իսլամական Հանրապետության նախագահ Սեյյեդ Էբրահիմ Ռաիսին։
Ըստ Ռաիսիի, Իրանը պահպանում է տարածաշրջանի անվտանգությունը և կանգնած է ահաբեկչական տարրերի դեմ։ Դրա հետ միասին Իրանի նախագահն նշել է, որ արտաքին ուժերի ներկայությունը երկրի հարակից տարածաշրջաններում սպառնում է Իրանի անվտանգությանը: Վերջինս նախազգուշացրել է, որ եթե Իսրայելն ամենափոքր քայլը ձեռնարկի Թեհրանի դեմ, ապա կբախվի Իրանի կոշտ պատասխանին, ինչպես նաև Հայֆայի և Թել Ավիվի ավերմանը:
Էբրահիմ Ռաիսին ընդգծել է նաև, որ Իրանի Իսլամական Հանրապետության ուժն ու նրա ռազմական հզորությունը բխում են տարածաշրջանի շահերից։
Հատկանշական է, որ Իրանի նախագահի այս խոսքերին զուգընթաց Ադրբեջանի նախագահ Իլհամ Ալիևը Բաքվում ընդունել է Իսրայելի արտաքին գործերի նախարար Էլի Քոհենին։
Քոհենը Բաքվում հայտարարել է, որ «Իսրայելից Ադրբեջան է եկել երբևէ ամենամեծ պատվիրակությամբ»։
«Ադրբեջանի և Իսրայելի հարաբերությունները ռազմավարական են, ուստի Իսրայելում դեսպանատան բացումից հետո ես որոշեցի գալ ձեր գեղեցիկ երկիր։ Մենք հիանալի հարաբերություններ ունենք ադրբեջանական ժողովրդի և հրեա ժողովրդի և կառավարությունների միջև: Մենք Ադրբեջանը դիտարկում ենք որպես ռազմավարական գործընկեր»,- ասել է հրեա նախարարը։
