«Լուսանկարչական արվեստը բուժհաստատություններում». «Մուրացան» հիվանդանոցին 20 լուսանկար կնվիրեն
Նմանատիպ
Այսօր ԵՊԲՀ «Մուրացան» համալսարանական հիվանդանոցում (հասցեն’ Մուրացան 114) Հայ առաքելական եկեղեցու ԱՄՆ Արևելյան թեմի Հայ Օգնության Ֆոնդը «Լուսանկարչական արվեստը բուժհաստատություններում» հիմնադրամի հետ համատեղ 20 լուսանկար կնվիրի բուժհաստատությանը:
Դրանք տարբեր լուսանկարիչների կողմից արված աշխատանքներ են, որոնք կոչված են վերականգնելու հիվանդների հոգու հավասարակռությունը և մեղմելու նրանց ցավերը:
ՀՕՖ-ից տեղեկացնում են, որ այս նախաձեռնությունը պատկանում է չիկագոյաբնակ մեր հայրենակցուհի Քրիստին Մխիթարյանին, ով ԱՄՆ-ում հայտնի անուն է ինտերիեր դիզայնի և արվեստաբուժության ոլորտում:
ՀՕՖ-ում կարծում են, որ իրենք նման նախաձեռնություն իրականացնող առաջին կազմակերպությունն են Հայաստանում: Բուժհաստատության աշխատակիցների կողմից դրական արձագանքի դեպքում Քրիստին Մխիթարյանն ու ՀՕՖ–ը կշարունակեն համագործակցությունը և լուսանկարներ կտարամադրեն Երևանի, ինչպես նաև ՀՀ մարզերի այլ հիվանդանոցների։
Հայ առաքելական եկեղեցու ԱՄՆ Արևելյան թեմի Հայ Օգնության Ֆոնդը (ՀՕՖ), որ ստեղծվել է 1988թ. երկրաշարժից անմիջապես հետո, շարունակում է բարեգործական ծրագրեր իրականացնել Հայաստանի բոլոր մարզերում, ինչպես նաև Ջավախքում ու Լեռնային Ղարաբաղում: Տրամադրվող օգնության գումարային արժեքն արդեն հատել է 300մլն. դոլարի սահմանը:
Հետևեք մեզ նաև Telegram-ում