Արևմուտքի տիեզերական արբանյակները կարող են թիրախ դառնալ․ ՌԴ ԱԳՆ

Արևմուտքի քվազի քաղաքացիական տիեզերական արբանյակները, որոնք օգտագործվում են հակամարտություններում, կարող են պատասխան հարվածի “օրինական թիրախ” դառնալ, ռուս լրագրողներին տված հարցազրույցում հայտարարել է ՌԴ ԱԳՆ սպառազինությունների չտարածման եւ վերահսկողության հարցերով դեպարտամենտի տնօրեն Վլադիմիր Երմակովը:

Ավելի վաղ ԱՄՆ-ն և Ուկրաինան բազմիցս հայտարարել են, որ համագործակցում են Ուկրաինայի զինված ուժերի կարիքների համար ամերիկյան արբանյակների տվյալների տրամադրման հարցերում:  Այդ  ծառայությունները ներառվել են Կիևին ռազմական օգնության փաթեթներից մեկում։ Միևնույն ժամանակ, սեպտեմբերին Maxar ընկերության կայքը հաղորդել էր, որ նրա  կոմերցիոն արբանյակները երկու անգամ նկարահանել են Սևաստոպոլը: Մասնավորապես, սեպտեմբերի 19-ին և 20-ին  Սևաստոպոլը նկարահանել են WorldView – 3 և  WorldView-2  արբանյակները ։ Արձակման պահին արբանյակները թույլ են  տվել  ստանալ բարձր դետալային պատկերներ։ Իսկ սեպտեմբերի 22-ին Կիևը հրթիռային հարված է հասցրել Սևաստոպոլին։ Վնասվել էր Սևծովյան նավատորմի շտաբի պատմական շենքը, մեկ զինծառայող անհետ կորել էր։

“Քվազի – քաղաքացիական ենթակառուցվածքը  տիեզերքում միանգամայն տրամաբանորեն կարող է պատասխան հարվածի օրինական թիրախ դառնալ”, – ասել է Երմակովը: “Արեւմուտքի երկրների գործողությունների արդյունքում չարդարացված ռիսկերի են ենթարկվում խաղաղ տիեզերական գործունեության կայունությունը, ինչպես նաեւ երկրի վրա բազմաթիվ սոցիալ-տնտեսական գործընթացներ, որոնցից կախված է մարդկանց բարեկեցությունը, առաջին հերթին զարգացող երկրներում”, – ՌԻԱ նովոստիի փոխանցմամբ  հավելել է դիվանագետը:

Նրա խոսքով ՝ քաղաքացիական արբանյակների նման սադրիչ կիրառումն առնվազն հարցեր է առաջացնում 1967 թվականի տիեզերքի մասին պայմանագրի համատեքստում, որը նախատեսում է տիեզերական տարածության բացառապես խաղաղ օգտագործում, եւ պահանջում է միջազգային հանրության ամենալուրջ դատապարտումը: