ԱՄՆ-ն հարվածել է բեռնատար նավի Օմանի ծոցում․ Mehr

Իրանական Mehr գործակալության փոխանցմամբ՝ ԱՄՆ-ն հարված է հասցրել բեռնատար նավի Օմանի ծոցում։

Հաղորդվում է, որ միջադեպը տեղի է ունեցել վաղ առավոտյան Օմանի ծոցում։ Ըստ հրապարակման՝ հարվածի թիրախ է դարձել 150 տոննա կշռող բեռնատար նավ, որը շարժվում էր Սիրիկից (Իրան) դեպի Օման՝ Հասաբ նավահանգստից տեղափոխելով առաջին անհրաժեշտության ապրանքներ։

Աղբյուրի տվյալներով՝ նավում գտնվող անձնակազմի բոլոր հինգ անդամները հաջողվել են փրկվել մոտակայքով անցնող նավերի օգնությամբ և տեղափոխվել Օման։

Նշվում է, որ դեպքի վերաբերյալ այլ աղբյուրներից անկախ հաստատում այս պահին չի ստացվել, իսկ կողմերի պաշտոնական մեկնաբանությունները չեն հրապարակվել։

Տարածաշրջանում լարվածության աճի ֆոնին նման հաղորդագրությունները լրացուցիչ մտահոգություններ են առաջացնում ծովային անվտանգության և նավագնացության անխափանության վերաբերյալ։

Հետևեք մեզ նաև Telegram-ում