Պատերազմն Ուկրաինայում և եղանակային ծայրահեղ պայմանները մեծացնում են նոր գլոբալ պարենային ճգնաժամի վտանգը․ Bloomberg

Ուկրաինայում շարունակվող պատերազմն ու աշխարհի տարբեր տարածաշրջաններում գրանցվող ծայրահեղ եղանակային պայմանները կարող են հանգեցնել նոր գլոբալ պարենային ճգնաժամի։ Այդ մասին հայտնում է Bloomberg-ը։

Աղբյուրի փոխանցմամբ՝ հիմնական ռիսկային գոտին շարունակում է մնալ Սևծովյան տարածաշրջանը։ Ռուսաստանն ու Ուկրաինան ապահովում են համաշխարհային ցորենի առևտրի ավելի քան մեկ քառորդը, արևածաղկի յուղի արտահանման գրեթե երկու երրորդը և եգիպտացորենի մատակարարումների շուրջ 10 տոկոսը։ Հացահատիկային ենթակառուցվածքների և բեռնատար նավերի նկատմամբ փոխադարձ հարձակումների ֆոնին հուլիսին ցորենի համաշխարհային գներն աճել են ավելի քան 10 տոկոսով, ինչը 2024 թվականից ի վեր ամենամեծ ամսական աճն է։

Իրավիճակը բարդանում է նաև այլ խոշոր գյուղատնտեսական տարածաշրջաններում առաջացած խնդիրներով։ Եվրոպայում շոգը, երաշտը և անտառային հրդեհները կարող են հանգեցնել վերջին տասնամյակների ընթացքում հացահատիկի արտադրության ամենամեծ կրճատմանը։ Միաժամանակ Ավստրալիայում շարունակվող չոր եղանակը վտանգում է երկրի հիմնական արտահանող նահանգներից մեկում ցորենի բերքը։

Ռիսկի տակ է հայտնվել նաև բրնձի արտադրությունը, որը հանդիսանում է աշխարհի բնակչության ավելի քան կեսի հիմնական սննդամթերքներից մեկը։ Էլ Նինյո կլիմայական երևույթի ուժեղացումը կարող է երաշտ առաջացնել Վիետնամում, Ֆիլիպիններում և Հնդկաստանում, որը բրնձի աշխարհի խոշորագույն արտադրողն ու արտահանողն է։ Արդեն այժմ բրնձի գները հասել են վերջին 18 ամիսների առավելագույն մակարդակին։

Bloomberg-ի գնահատմամբ՝ ֆերմերների վրա լրացուցիչ ճնշում են գործադրում նաև ԱՄՆ-ի և Իրանի միջև հակամարտության ֆոնին վառելիքի և պարարտանյութերի թանկացումը։

Հետևեք մեզ նաև Telegram-ում