Հայաստանը՝ Արհեստական բանականության տարածաշրջանային կենտրոն. NVIDIA-ի փոխնախագահ

NVIDIA ընկերության փոխնախագահ Ռև Լեբարեդյանի գնահատմամբ՝ Հայաստանն ու Ղազախստանը մեծ ներուժ ունեն վերածվելու Արհեստական բանականության տարածաշրջանային կենտրոնների՝ համատեղելով մասնագիտական ներուժը, հաշվողական հզորություններն ու տեխնոլոգիական բիզնեսը։

Աստանայում անցկացված «Արհեստական բանականություն և թվային կամուրջ» համաժողովից հետո Լեբարեդյանը ընդգծել է, որ նման կենտրոնների ձևավորման համար անհրաժեշտ է երեք հիմնական բաղադրիչ՝ համապատասխան հաշվողական ենթակառուցվածք, այն արդյունավետ օգտագործող մասնագետներ և ձեռնարկատերեր։

«Միավորեք այս երեք բաղադրիչները, և փոքր թիմերը կարող են ստեղծել արտադրանք ամբողջ աշխարհի համար»,– նշել է NVIDIA-ի փոխնախագահը։

Որպես նման համագործակցության հաջողված օրինակներ՝ նա առանձնացրել է Higgsfield AI և Firebird AI ընկերությունները։ Լեբարեդյանի խոսքով՝ Firebird AI-ը, Kazakhtelecom-ը և Data Center Valley Kazakhstan-ը զարգացնում են հաշվողական ենթակառուցվածք, որը կարող է նպաստել նոր գլոբալ տեխնոլոգիական ընկերությունների ձևավորմանը։

Այցի շրջանակում Լեբարեդյանը հանդիպել է նաև Ղազախստանի նախագահ Կասիմ-Ժոմարտ Տոկաևի հետ։ Քննարկման առանցքում եղել է Էկիբաստուզում իրականացվող Data Center Valley նախագիծը, որի նախատեսվող հզորությունը շուրջ 300 ՄՎտ է՝ հետագայում մինչև 1 ԳՎտ ընդլայնվելու հնարավորությամբ։ Տոկաևը կարևորել է NVIDIA-ի և Firebird-ի հետ ձեռք բերված պայմանավորվածությունները, իսկ Լեբարեդյանը հայտնել է, որ NVIDIA-ն նախատեսում է մասնակցել նախագծի հաջորդ փուլին։

Հետևեք մեզ նաև Telegram-ում