«Չելսին» 9 ֆուտբոլիստով մոտ էր քամբեքին, այլ արդյունքներ (տեսանյութ)
Նմանատիպ
Պրեմիեր լիգայի առաջին տուրում շարունակվում են թրիլերային սցենարով հանդիպումները:
Չեմպիոն «Չելսին» սեփական հարկի տակ ընդունել էր «Բերնլիին»: Արդեն 14-րդ րոպեին լոնդոնցիները մնացել են 10 ֆուտբոլիստով․ «բաց ոտքով» կոպիտ սահանկման համար խաղադաշտից հեռացվել է Գարի Կեհիլը: Առաջին կեսում «թոշակառուների» մղձավանջը շարունակվել է․ մրցակիցն օգտվելով թվային առավելությունից՝ 3 գոլ է խփել:
Միայն ընդմիջումից հետո Անտոնիո Կոնտեին հաջողվել է փոխել իր թիմի խաղը: Փոխարինման մտած Ալվարո Մորատան կարողացել է կրճատել հաշվի տարբերությունը: Երբ «Չելսին» մոտ է եղել երկրորդ գոլին, ևս մեկ կարմիր քարտ է ստացել: Կոպիտ խաղի համար երկրորդ դեղին քարտին է արժանացել Ֆրանսեսկ Ֆաբրեգասը: Առաջին զգուշացումը կատալոնացուն ցուցադրվել էր մրցավարին հեգնական ծափահարելու համար:
Քիչ անց չեմպիոնին հաջողվել է 9 խաղացողով ևս մեկ գնդակ խփել։ Մորատայի փոխանցումից հետո աչքի է ընկել Դավիդ Լուիսը: Հաշվի մեջ այլ փոփոխություններ չեն արձանագրվել։
Այսպիսով, «Չելսին» դարձավ ԱՊԼ-ի պատմության երկրորդ թիմը, որը չեմպիոնի կարգավիճակով նոր առաջնությունը սկսում է պարտությամբ: Նախորդ դեպքը գրանցվել էր մեկ տարի առաջ, երբ «Լեսթերը» պարտվել էր «Հալ Սիթիին»:
ԱՊԼ, 1-ին տուր
«Չելսի» – «Բերնլի»` 2:3
Գոլերը՝ Մորատա (69), Լուիս (88) – Վոուկս (24, 43), Ուորդ (39)
Զուգահեռաբար խաղում «Էվերթոնը» Ուեյն Ռունիի գոլի շնորհիվ 1:0 հաշվով հաղթել է «Սթոք Սիթիին»: Անգլիայի առաջնության նորեկ «Հադերսֆիլդն» արտագնա խաղում խոշոր հաշվով պարտության է մատնել «Կրիսթալ Փելասին» (3:0), «Վեսթ Բրոմվիչը» տանը հաղթել է «Բորնմութին» (1:0), իսկ «Սաութհեմփթոն» – «Սուոնսի» մրցավեճում հաշիվը չի բացվել (0:0):