Գարիկ Կարապետյանը նվաճել է արծաթե փոքր մեդալ

Էլ Ռիյադում ընթացող ծանրամարտի աշխարհի առաջնությունում օլիմպիական համարվող 102 կգ քաշային կարգում Սամվել Գասպարյանը երկամարտի 394 կգ արդյունքով զբաղեցրեց 4-րդ, իսկ Գարիկ Կարապետյանը 393 կգ արդյունքով 5-րդ տեղը։

Աշխարհի 2022 թվականի առաջնությունում այս քաշային կարգում Սամվել Գասպարյանը երկամարտում դարձել էր բրոնզե մեդալակիր։

Առաջին մոտեցման համար Կարապետյանը պատվիրել էր 175 կգ, իսկ Գասպարյանը 178 կգ։ Ընդ որում` Սամվելի պատվերը ամենաբարձրն էր A խմբի մասնակիցների մեջ։ Երկրորդ մոտեցման ժամանակ պատվիրել են 183 կգ։ Բայց  տղաները քաշը բարձրացնել չկարողացան։ Երրորդ մոտեցումով Կարապետյանը գլխավերևում պահեց 183 կգ, իսկ Գասպարյանը փոքր ոսկե մեդալը նվաճելու համար փոխեց քաշն ու պատվիրեց 184 կգ, բայց նորից ձախողվեց։ Կարապետյանը պոկում վարժությունում դարձավ արծաթե մեդալակիր, իսկ Գասպարյանը զբաղեցրեց 5-րդ տեղը։

Հրում վարժությունում Գարիկ Կարապետյանին հաջողվեց միայն իրացնել առաջին մոտեցումը ու, բարձրացնելով 210 կգը, երկամարտի 393 կգ արդյունքով մեր ծանրորդն ավարտեց ելույթը` երկամարտում զբաղեցնելով 5-րդ տեղը։

Սամվել Գասպարյանն առաջին մոտեցման ժամանակ բարձրացրեց 216 կգ և երկամարտում գերազանցեց իր թիմակցին, բայց մեդալ վաստակելու համար ավելին էր պետք։ Իսկ Կարապետյանը հաջորդ երկու մոտեցումների ժամանակ չկարողացավ գլխավերևում պահել 222 կգ կշռող ծանրաձողը։ Եվ երկամարտում 394 կգ արդյունքով զբաղեցրեց 4-րդ տեղը։ Աշխարհի չեմպիոնի կոչումը երկամարտի 404 կգ արդյունքով նվաճեց չինացի Հուանհուա Լիուն։

Այսօր՝ սեպտեմբերի 15-ին, Հայաստանի հավաքականի կազմում մրցահարթակ են դուրս գալու կանայք։ 81 կգ քաշային կարգում հանդես կգա Լիանա Գյուրջյանը, իսկ 87 կգ քաշային կարգում մենք ունենալու ենք երկու մասնակից՝ Հռիփսիմե Խուրշուդյանն ու Տաթև Հակոբյանը։