Ահռելի աղետ. Ջրհեղեղի հետևանքով Լիբիայում ավելի քան 11.000 մարդ է զոհվել

Այս շաբաթ ամենասարսափելի փոթորիկը անձրևով հարվածեց Արևելյան Լիբիայի Կանաչ լեռներին: Երկրի հյուսիս-արևելյան հատվածում ջրհեղեղի պատճառ է դարձել սեպտեմբերի 10-ին Լիբիան պատուհասած «Դանիել» փոթորիկը։ Աղետից հիմնականում տուժել են ափամերձ Դերնա, Ջաբալ ալ-Ախդար և Բենղազի քաղաքները։ Իսկ արդեն սեպտեմբերի 11-ին փլուզվել է առաջին ամբարտակը:

Դերնայում ջուրը ճեղքել է ամբարտակները և ողողել թաղամասերը։ Լուսադեմին քաղաքի մեկ երրորդը չկար, հազարավոր մարդիկ անհետ կորած էին։ Տեղի պաշտոնյաներն ասում են, որ զոհերի նվազագույն թիվը, ամենայն հավանականությամբ, կլինի ավելի քան 11 հազար մարդ, ևս 20 հազարը համարվում են անհետ կորած։ Դիակներն ամենուր են։ Արևելյան Լիբիայի կառավարության պաշտոնական ներկայացուցիչի տվյալներով «անընդհատ ծովում են հայտնվում հարյուրավոր դիակներ»։

Լիբիայում շատ մարդիկ տեղի ունեցածն անվանում են ցունամի, այլ ոչ թե ջրհեղեղ՝ փորձելով ֆիքսել ավերածությունների ֆիզիկան և ուժը: Դեռնայի մոտ 100,000 բնակիչները, որոնք այժմ արգելափակված են, շտապ ապաստանի, սննդի, ջրի և բժշկական օգնության կարիք ունեն: Նրանց պետք են ինժեներներ՝ վերակառուցելու բոլոր ճանապարհները և ամրացնելու քաղաքի գործող, բայց վնասված նավահանգստի մասերը: Նրանք բջջային հեռախոսի ծառայության կարիք ունեն ընտանիքի անդամներին և ընկերներին հասնելու համար: Հազարավոր մարդիկ անօթևան են, և պաշտոնյաները մտավախություն ունեն, որ տարածքում գտնվող այլ ամբարտակներ նույնպես կարող են պայթել:

Ոչնչացման մասշտաբները սարսափելի կլինեին ցանկացած լավ կառավարվող երկրի համար: Լիբիայի համար անհնար կլինի արագ վերականգնումը՝ հաշվի առնելով աղետի գոտու հանկարծակի մեկուսացումը, սարքավորումների բացակայությունը և երկրի քաղաքական դիսֆունկցիայի խորությունը: 2014 թվականից ի վեր լիբիացիները ապրում են երկու մրցակցող կառավարությունների հետ, որոնք հիմնականում զբաղված են իշխանության համար պայքարով, որը գրեթե անկասկած կդանդաղեցնի վերականգնման լայնածավալ ջանքերը: Անդադար տեղումների պատճառով տարածաշրջանում փակվել են օդանավակայաններն ու ծովային նավահանգիստները։ Իշխանությունները աղետի գոտիներ են հայտարարել ամենավատ տուժած Սուսու և Դերնա քաղաքները:

Լիբիայի Կարմիր Խաչի միջազգային կոմիտեն քաղաքացիներին և փրկարարներին կոչ է արել չափազանց զգույշ լինել, քանի որ ջրհեղեղը հանգեցրել է 2020 թվականին ավարտված քաղաքացիական պատերազմից հետո արևելյան հատվածում մնացած պայթուցիկ զինամթերքի տեղաշարժին: 

Բոլոր կոմունիկացիաները վնասված են, բջջային կապն ու ինտերնետը չեն աշխատում։ Փողոցները պատված են ցեխով, լցված են արմատախիլ արված ծառերով և կոտրված մեքենաների բեկորներով։Խորհրդարանի նախագահ Ագիլա Սալեհը կոչ է արել գլխավոր դատախազին հետաքննել աղետի պատճառները և պարզել, թե արդյոք եղել է անփութություն։ Նա նաև ասաց, որ կառավարությունը պետք է վեց ամսվա ընթացքում զբաղվի արտակարգ իրավիճակի հետևանքներով և տուժածներին տրամադրի բնակարանային և բժշկական օգնություն։