Երևանի հանրային տրանսպորտում արդեն գործում է միասնական տոմսային համակարգը

Երևանի հանրային տրանսպորտում մեկնարկել է միասնական տոմսային համակարգի ներդրման հիմնական ծրագիրը: Տեղեկությունը հայտնում է Երևանի քաղաքապետարանի մամուլի ծառայությունը։

Միասնական տոմսային համակարգն արդեն գործում է 36 համարի ավտոբուսում։

Նշվում է, որ առաջիկա մեկ ամսում ամբողջապես կավարտվի MAN ավտոբուսների կահավորումը, այնուհետև տոմսային միասնական համակարգ կներդրվի տրոլեյբուսներում ու մետրոպոլիտենում: Մինչև տարեվերջ գործընթացը կավարտվի ներկրված մյուս բոլոր ավտոբուսներում:

«Կլինեն թղթային մեկանգամյա օգտագործման QR code-ով տոմսեր, մշտական օգտագործման ավտոբուսային քարտեր, բանկային քարտեր ու բջջային հավելված: Telcell-ում կա «Տրանսպորտ» կոճակը, որը սեղմելով հնարավոր է ձեռք բերել մեկանգամյա օգտագործման QR code-ով տոմս։ Այն հեշտությամբ ճանաչում է (վալիդացնում է) ավտոբուսում տեղադրված համապատասխան սարքը»,– նշել է «Երևան քաղաքի կառավարման տեխնոլոգիաների կենտրոն» ՓԲԸ տնօրեն Սարգիս Մանուկյանը։

Նրա խոսքով` համակարգի ամբողջական ներդրումից հետո Երևանը կձերբազատվի մետաղադրամներով վճարելուց։

Քաղաքապետարանից վստահեցնում են, որ սկզբանական փուլում չեն բացառում, որ դժվարություններ կլինեն ինչպես վալիդացման սարքից օգտվելու, այնպես էլ տոմսային միասնական համակարգի հետ կապված։