Արա Աբրահամյանի քաղաքական ծրագրերը շատ լավ «գնում են», իսկ Հովիկ Աբրահամյանն արեց, ինչ կարող էր

Հովիկ Աբրահամյանը վարչապետի պաշտոնում արեց այնքան, որքան կարող էր, երբ նայում ենք Հայաստանի ՀՆԱ-ի աճի ցուցանիշին: Այս մասին լրագրողների հետ զրույցում նկատեց Ռուսաստանի հայերի միության նախագահ Արա Աբրահամյանը:

«Ռուսաստանից շատ աճ է եղել՝ 4-5 տոկոս: Նա արեց այնքան, որքան կարողացավ, իսկ հիմա նոր կառավարություն է եկել: Ես շատ լավ գիտեմ պարոն Կարապետյանին և շատ դրական: Մենք մի բան պիտի հասկանանք՝  որպեսզի կառավարությունն արդյունավետ աշխատի, պետք է ուժերը միացնել, մենք մեր ունեցած  պոտենցիալն ու ռեզերվները պետք է գումարենք իրար: Այնպես չի որ նշանակեցին մենակ կարող է…կամ Աբրահամյան Արան, որ ուզում է ինչ-որ բան անել, մենակ կարող է անել: Ոչ, ինքան էլ ես ուզենամ, մեզ պետք է միասնություն: Պատկերացրեք, որ մենք մեր ուժը գումարենք, ես երեկ ասեցի՝ Սփյուռքի ուժը չի օգտագործվում, լավագույն դեպքում՝ 1 տոկոս»,-ընդգծեց նա:

Այս համատեքստում Աբրահամյանն ակնարկեց, որ իր հարազատ գյուղում օրեր առաջ է եղել և բոլորն ասում են՝ երկիրը երկիր չի, ապագա չկա, սրան պիտի վերջ տալ. «Նման բան չկա, սա շատ լավ երկիր է, այստեղ կա ապագա: Մենք պիտի փոխենք մեր մտածելակերպը: Հասկանում եմ, որ տնտեսության վիճակը շատ վատ է, կան շատ մարդիկ, որոնք իրոք օգնության կարիք ունեն, բայց դա չի նշանակում, որ պիտի տարածենք՝ էս երկիրն ապրելու տեղ չի: Տնտեսական ինչ ասես կարող է լինել, եթե բառերին նայենք և չգործենք»:

Միաժամանակ ըստ Աբրահամյանի՝ մենք պիտի փոխվենք առաջինը, որ դրսից ներդրողներ գան. «Ասում եք, թե ինչու ներդրում չեմ անում «Նաիրիտում», դրա համար նոր պայմաններ են  պետք»:

Ինչ վերաբերում է իր քաղաքական ծրագրերին, Աբրահամյանն ասաց, որ դրանք շատ լավ «գնում են»: