ԹՐԻՓՓ-ը հայ-ամերիկյան պրոյեկտ է՝ Ադրբեջանի և Թուրքիայի համար. Ռոբերտ Քոչարյան
Կարդացեք նաև
Այսօր հրավիրված ասուլիսում ՀՀ երկրորդ նախագահ Ռոբերտ Քոչարյանն ասել է, որ հին աշխատակարգը փլվել է, նորը ձևավորվում է։ Ամենահետաքրքիրն այն է, որ Միացյալ նահանգներն ապամոնտաժում է այն աշխարահակարգը, որը հենց ինքն էլ ձևավորել է։ Սա արձանագրված է ԱՄՆ նոր հայեցակարգով։
«Բավականին հետաքրքիր փաստաթուղթ է։ ԱՄՆ-ն ընդունում է, որ աշխարհն այլևս բազմաբևեռ է, հրաժարվում են գաղափարական հեգեմոնիայից։ Հետաքրքիր արձանագրում, որ հիմնական հակառակորդն այսօր Չինաստանն է, մյուս արձանագրումը, որ Ռուստաստանի հետ պատրաստ են և տեսնում են հնարավորություն՝ կառուցողական և պրագմատիկ հարաբերություններ կառուցելու։ Եվրոպացիների համար արձանագրումը նվաստացուցիչ էր, որ Եվրոպան դեգրադացվում է»,- նշել է Քոչարյանը՝ ուշադրություն հրավիրելով այն հանգամանքին, որ Հարավային Կովկասի մասին որևէ նշում չկա, ինչը նշանակում է, որ ԱՄՆ-ն այստեղ չունեն շահեր՝ ոչ տնտեսական, ոչ անվտանգային։
«Այդ փաստաթղթում զրո հիշատակում Հարավային Կովկասի մասին, սա նշանակում է, որ ԱՄՆ-ն այստեղ չունի ֆունդամնետալ շահեր ոչ տնտեսական, ոչ էլ անվտանգային։ Սա է իրականությունը»,-ասել է նա։
Այս գործընթացներում ի՞նչ պետք է անի Հայաստանը։ Նախկին նախագահի գնահատմամբ, աշխարհը հիմա շատ ավելի վտանգավոր է։
«Հայաստանը պետք է անի ամեն ինչ գերտերությունների շահերի բախման կետում չհայտնվելու համար։ Անցած անգամ նման ձևակերպումն եմ տվել, հիշեցնեմ՝ հմուտ նավապետը փոթորիկի ժամանակ իր նավը օվկիանոս չի հանում՝ չվտանգելու համար և նավը, և անձնակազմը, սա ուղղակի վերաբերում է Հայաստանի Հանրապետությանը»,-նշել է նա։
Անդրադառնալով «Թրիփփ»-ի ծրագրին, Ռոբերտ Քոչարյանն ասել է, որ դա հայ-ամերիկյան պրոյեկտ է՝ Ադրբեջանի և Թուրքիայի համար։
Նա նշել է, որ այս ֆորմատով ծրագրում հայկական շահ չի երևում. «Հայաստանը նույնիսկ այստեղ կողմ չէ, դարձել է կիսակողմ։ Ընդհանրապես, տրանզիտային ուղիներն ունեն երկու գործոն, մեկը՝ աշխարհաքաղաքական կշիռ է հաղորդում նրան, ով կոնտրոլի տակ է պահում, իսկ երկրորդը տնտեսական է։ Հիմա ԱՄՆ-ին այդ ազդեցություն տալը նշանակում է, որ աշխարհաքաղաքական գործոնը զրոյացվել է»։
Ըստ Քոչարյանի, ԱՄՆ-ն այս ծրագրում 0 տնտեսական շահ ունի: Միակ հետաքրքրող հանգամանքը Իրանն է, որին ԱՄՆ-ը փորձում է հայ-իրանական սահմանը վերցնել վերահսկողության տակ:
Հետևեք մեզ նաև Telegram-ում