Անանուն կոչեր սոցցանցերում․ Բելգիայի մայրաքաղաքում պատրաստվում են բողոքի ակցիաների նոր ալիքին

Շաբաթվա սկզբից ի վեր սոցիալական ցանցերում շրջանառվում են հավաքների անանուն կոչեր, որոնք տարածվում են արհեստական բանականության միջոցով գեներացված թվային թռուցիկների տեսքով։ Ստեղծված իրավիճակում Բրյուսելի կենտրոնական հատվածի առևտրականները ստիպված են եղել նախապատրաստվել վատթարագույն սցենարներին։

Առաջին փայտյա պատնեշներն ու պաշտպանիչ վահանակները հայտնվել են դեռևս չորեքշաբթի օրը Ռյու Նով (rue Neuve) փողոցում գտնվող «Nike», «JD», «New Yorker» և «Foot Korner» խանութ-սրահների ցուցափեղկերին։ Այս չորս խանութները թալանվել էին հոկտեմբերի 17-ին տեղի ունեցած ցույցերի ընթացքում բռնկված անկարգությունների ժամանակ։

Ուրբաթ առավոտյան բանվորների մի քանի խմբեր շարունակում էին փակել որոշ առևտրի կետերի ցուցափեղկերը։ Ռյու Նով փողոցում գտնվող «Hunkemöller» խանութի կառավարիչ Ժյուլին նշել է, որ եթե իրենք մնային առանց պաշտպանիչ պատնեշների միակ խանութներից մեկը, թալանի ենթարկվելու հավանականությունը կտրուկ կբարձրանար, ուստի քայլեր են ձեռնարկել աշխատակիցների և հաճախորդների անվտանգությունն ապահովելու համար։

Միևնույն ժամանակ, փողոցի որոշ խանութներ, ինչպիսին է «Courir»-ը, փակցրել են հայտարարություններ այն մասին, որ խանութը շարունակում է բաց մնալ։ Խանութի աշխատակից Լեոյի փոխանցմամբ՝ պատուհանները փակելուց հետո իրենց հաճախելիությունը նվազել է առնվազն մեկ երրորդով, թեև նա չի բացառում, որ հաճախորդների կրճատման վրա կարող էր ազդած լինել նաև «Օսթին» փոթորիկը։ Տեղի բնակիչներից Մարիան, անդրադառնալով քաղաքում տիրող իրավիճակին, նշել է, որ մթնոլորտը չափազանց անհանգստացնող է, և շուրջ 15 տարի այդ թաղամասում ապրելու ընթացքում երբեք նման մասշտաբի անվտանգության միջոցառումների չի ականատես եղել։

Հետևեք մեզ նաև Telegram-ում