Բաքուն շարունակում է «ինքնամեկուսացումը»․ Ադրբեջանում կարանտինային ռեժիմը երկարաձգվեց մինչև 2027 թվականը

Ադրբեջանի իշխանությունները հերթական անգամ երկարաձգել են երկրի տարածքում գործող հատուկ կարանտինային ռեժիմի ժամկետը՝ պահպանելով ցամաքային սահմանների շրջափակումը։ Բաքվի Նախարարների կաբինետի որոշմամբ՝ «կովիդյան» սահմանափակումները կգործեն մինչև 2027 թվականի հունվարի 2-ը, ժամը 06:00-ն։

Պաշտոնական Բաքուն սահմանների փակ պահելը կրկին փորձում է հիմնավորել կորոնավիրուսային վարակի (COVID-19) տարածումը կանխարգելելու պատրվակով։ Սակայն ակնհայտ է, որ համաշխարհային համավարակի ավարտից տարիներ անց Ալիևի ռեժիմն այս ձևական ռեժիմն օգտագործում է բացառապես սեփական քաղաքական ու անվտանգային նպատակների, երկրի ներսում վերահսկողությունը խստացնելու և քաղաքացիների տեղաշարժը սահմանափակելու համար։

Այսպիսով, Հարևան պետությունների, այդ թվում՝ Վրաստանի, Իրանի ու Ռուսաստանի հետ Ադրբեջանի ցամաքային սահմանները շարունակելու են փակ մնալ։ 2020 թվականից ի վեր կիրառվող այս քաղաքականությունը փաստացի երկիրը պահում է արտաքին աշխարհից ցամաքային մեկուսացման մեջ, ինչից առաջին հերթին տուժում են հենց տեղի բնակիչներն ու տարածաշրջանային հաղորդակցությունը։

Հետևեք մեզ նաև Telegram-ում