Տավուշի մարզում Ադրբեջանի քաղաքացի է հայտնաբերվել․ ԱԱԾ-ն հայտնում է մոլորվելու մասին

Հայաստանի Հանրապետության Ազգային անվտանգության ծառայությունը (ԱԱԾ) հաստատել է Տավուշի մարզում Ադրբեջանի քաղաքացու հայտնաբերման փաստը։ Գերատեսչության պաշտոնական հայտարարության համաձայն՝ իրականացված ստուգումների արդյունքում պարզվել է, որ նա Հայաստանի տարածքում է հայտնվել մոլորվելու հետևանքով։

Սահմանահատման մասին ավելի վաղ տեղեկացրել էին հայկական լրատվամիջոցները, որոնց փոխանցմամբ՝ ադրբեջանցի հովիվը ոչ թե մոլորվել է, այլ սպիտակ դրոշով կամավոր անցել է հայկական կողմ՝ հանձնվելու նպատակով։ ԱԱԾ տվյալներով՝ սահմանախախտը Թովուզի շրջանի Չատախ գյուղի բնակիչ, 1968 թվականին ծնված Յաշար Ալի օղլու Քասիմովն է, ում հայտնաբերել են հոկտեմբերի 19-ին՝ ժամը 17։50-ի սահմաններում։ Ծառայությունից հավելել են, որ ներկայումս իրականացվում են համապատասխան գործողություններ նրան Ադրբեջան վերադարձնելու ուղղությամբ։

Հետևեք մեզ նաև Telegram-ում