Պատմական ռեկորդ Բրազիլիայում․ Լուլա դա Սիլվան հաղթել է նախագահական ընտրությունների երկրորդ փուլում

Բրազիլիայի գործող ձախակողմյան նախագահ Լուիս Ինասիու Լուլա դա Սիլվան հաղթանակ է տարել նախագահական ընտրությունների երկրորդ փուլում՝ սահմանելով պատմական ռեկորդ: 80-ամյա Լուլա դա Սիլվան դարձել է երկրի առաջին թեկնածուն, ում հաջողվել է հաղթել երկրորդ փուլում՝ առաջինում պարտվելուց հետո:

Քվեաթերթիկների շուրջ 99%-ի հաշվարկից հետո Լուլա դա Սիլվան ստացել է քվեների 51,75%-ը, իսկ նրա 45-ամյա մրցակից Ֆլավիու Բոլսոնարուն՝ 48,25%: Հոկտեմբերի սկզբին կայացած առաջին փուլում Բոլսոնարուն ավելի քան 2,2 միլիոն ձայնով առաջ էր անցել գործող նախագահից։ 1980-ական թվականներին Բրազիլիայում ժողովրդավարության վերականգնումից ի վեր առաջին փուլում երկրորդ տեղը զբաղեցրած որևէ թեկնածու երբևէ չէր հաղթել վճռորոշ փուլում:

Ընտրությունների արդյունքների հաստատումից հետո Լուլա դա Սիլվայի հազարավոր կողմնակիցներ դուրս են եկել Սան Պաուլուի փողոցներ: Քվեարկության նախօրեին ևս ծավալուն աջակցության ակցիաներ էին տեղի ունեցել. Ռիո դե Ժանեյրոյի Կոպակաբանա լողափում հավաքվել էր ավելի քան մեկ միլիոն մարդ, իսկ Սան Պաուլուի Պաուլիստա պողոտայում անցկացվել էր բազմահազարանոց քայլերթ: Հիշեցնենք, որ Լուլա դա Սիլվան Բրազիլիան առաջին անգամ ղեկավարել է 2003-2010 թվականներին, իսկ 2023 թվականին երկրորդ անգամ ստանձնել էր նախագահի պաշտոնը՝ Ժաիր Բոլսոնարուի նկատմամբ տարած հաղթանակից հետո։

Հետևեք մեզ նաև Telegram-ում