Տիգրան Սարգսյանն ընդունել է ՀՀ-ում Հնդկաստանի նորանշանակ դեսպանին

Հայաստանում Հնդկաստանի արտակարգ և լիազոր դեսպան Սուրեշ Բաբուն այսօր հանդիպել է վարչապետ Տիգրան Սարգսյանին: Այս մասին հաղորդում է Կառավարության մամուլի ծառայությունը:

Շնորհավորելով դեսպանին Հայաստանում դիվանագիտական առաքելությունը սկսելու կապակցությամբ՝ վարչապետը հույս է հայտնել, որ առաջիկայում հայ-հնդկական հարաբերությունները կշարունակեն խորանալ ու ընդլայնվել:

Սուրեշ Բաբուն պատրաստակամություն է հայտնել ներդնել բոլոր ջանքերը՝ երկու բարեկամ երկրների կապերին նոր թափ հաղորդելու ու գործնական ծրագրեր իրականացնելու համար:

Այդ համատեքստում, զրուցակիցները քննարկել են տնտեսական, տեղեկատվական տեխնոլոգիաների, գյուղատնտեսության և այլ բնագավառներում հետագա համագործակցությանն ու նախագծերի իրականացման հնարավորությանը վերաբերող հարցեր:
Հանդիպմանը դեսպանը վստահություն է հայտնել, որ Տիգրան Սարգսյանի գլխավորությամբ Հայաստանի կառավարությունը կշարունակի իր արագ տեմպերով տնտեսական զարգացումը, ինչն իր հերթին կնպաստի մեր երկիր հնդկական ներդրումների ներգրավմանը: