«Ռեալը», ի պատիվ Ռաուլի, ուզում է Սանտիագո Բեռնաբեուի գավաթը վիճարկել «Ալ-Սադդի» հետ

Մադրիդի «Ռեալի» ղեկավարությունը Սանտիագո Բեռնաբեուի գավաթի հերթական խաղարկությունում մտադիր է հանդիպում կազմակերպել քաթարական «Ալ-Սադդի» հետ, հաղորդում են իսպանական ԶԼՄ-ները:

«Արքայական» ակումբի ներկայացուցիչները արդեն կապվել են այդ ակումբի հետ ու այս պահին կոնկրետացնում են հանդիպման անցկացման ժամկետները:

Պետք է ընդգծել’ պատահական չէ, որ «Ռեալի» ուշադրությունը կանգ է առել հենց «Ալ-Սադդի» վրա: Վերջինիս կազմում է հանդես գալիս մադրիդյան ակումբի ու Իսպանիայի հավաքականի լեգենդար հարձակվող Ռաուլը: Իսպանական գրանդի ղեկավարությունը պատրաստվում է պատվել իր նախկին ֆուտբոլիստին: «Շալկե-04»-ն արդեն արել է դա, երբ 2012 թվականի ապրիլի 28-ին հանդիպում անցկացրեց’ ի պատիվ Ռաուլի: Գելզենկիրխենցիների կազմում իսպանացի ռմբարկուն անցկացրել է ընդամենը 2 տարի, մինչդեռ Մադրիդում’ 16: