«Հանրապետական» մարզադաշտի մամուլի ասուլիսների սրահում Հայաստանի ազգային հավաքականի գլխավոր մարզիչ Վարդան Մինասյանը` Մալթայի հետ խաղին ընդառաջ, պատասխանեց լրագրողների հարցերին:
Եթե Չեխիայի հետ խաղից հետո Վարդան Մինասյանն ասում էր, որ հավաքականի առջև Բրազիլիա գնալու խնդիր չկա դրված, ապա այսօր մարզիչը շեշտեց` ցանկացած խաղում անհրաժեշտ է հաղթել.
-Մեր խնդիրը ցանկացած խաղում հաղթելն է: Եթե բոլոր խաղերում հաղթենք, ապա Աշխարհի առաջնությաննը կմասնակցենք: Մենք չենք մտածում կոնկրետ այս խաղում հաղթելու մասին, ցանկացած թիմի հետ էլ ուզում ենք հաղթել՝ կապ չունի մրցակիցը ուժեղ է, թե ոչ: Հավաքականը կարող է հաղթել կամ պարտվել. ինձ համար կարևորը մթնոլորտն է: Հավաքականում անառողջ մթնոլորտ չկա: Չգիտեմ` Հենրիխ Մխիթարյանն ինչու է նման հայտարարություն արել, գուցե լրատվամիջոցներն են ուռճացրել,-մարզչի խոսքերը մեջբերում է Allsport.am-ի թղթակիցը:
Վարդան Մինասյանը նշեց, որ մի փոքր վնասվածք ունի Կառլեն Մկրտչյանը, սակայն հույս կա, որ նա կկարողանա խաղալ վաղը, իսկ Նորայր Ասլանյանի մասին ասաց.
-Նորայր Ասլանյանը պոտենցիալ ունեցող ֆուտբոլիստ է, սակայն հիմնական կազմում դեռևս չի լինի:
