Թուրքիան դադարել է լիցքավորել և սպասարկել ՌԴ-ի և Բելառուսի ինքնաթիռները

Թուրքիայի իշխանությունները որոշում են կայացրել արգելել Ռուսաստանի և Բելառուսի ամերիկյան արտադրության ինքնաթիռների լիցքավորումն ու տեխնիկական սպասարկումը, տեղեկացրել է թուրքական AirportHaber պարբերականը։ Պարբերականի տվյալներով՝ արգելքը վերաբերելու է ռուսական յոթ, բելառուսական մեկ եւ իրանական մեկ ավիափոխադրողների։

Ստամբուլում ինքնաթիռների լիցքավորումից հրաժարվելը հաստատել են «Կոմերսանտի» աղբյուրները երկու ավիաընկերություններում։ «Աշխատում ենք խնդրի լուծման ուղղությամբ»,- նշել է զրուցակիցներից մեկը։

«Աերոֆլոտում»  տեղեկացրել են, որ ավիաընկերությունը «թռիչքներ է կատարում Թուրքիայի քաղաքներ հաստիքային ռեժիմով, ըստ չվացուցակի, թռիչքների հայտարարված ծրագրի շրջանակում»։

Ինչպես նշվել է AirportHaber-ի հրապարակման մեջ, լիցքավորումը և այլ ծառայություններն արգելվել են մասնավոր, բեռնատար, կոմերցիոն եւ չարթերային ինքնաթիռների համար, որոնք ունեն ամերիկյան բաղադրամասերի ավելի քան 25 տոկոս և թռչում են Ռուսաստան կամ Բելառուս։ Այս միջոցների կիրառումը պահանջել է, ըստ թուրքական պարբերականի, ԱՄՆ առևտրի նախարարության Արդյունաբերության և անվտանգության բյուրոն իր հատուկ նամակում։

Մարտի սկզբից թուրքական մաքսային մարմինները սկսել են մերժել ԵՄ-ի պատժացուցակներում ներառված բեռների տարանցման հայտարարագրերը։ Մարտի 15-ին Անկարայում ՌԴ-ի դեսպան Ալեքսեյ Երխովը հայտարարել է «բեռների տեղափոխման կանոնների որոշակի խստացման մասին», սակայն այդ պահի դրությամբ ռուս բեռնափոխադրողներին հաջողվել էր ելք գտնել ստեղծված իրավիճակից։