Թայվանն ԱՄՆ-ի հետ համագործակցությամբ կփորձի նոր սերնդի կործանիչներ արտադրել։ Այս մասին հայտարարել է ռազմական ոլորտում մասնագիտացված թայվանական AIDC ընկերության ղեկավար Հու Քայ-Հունգը։
Թայվանի կառավարությունը մտահոգված է Պեկինի ուժեղացող ճնշումներից. վերջինս փորձում է ստիպել Թայվանին ընդունել Չինաստանի ինքնիշխանությունը:
Թեև Թայվանի օդուժը հագեցած է ամերիկյան F-16, ֆրանսիական Mirage, ինչպես նաև F-CK-1 Ching-kuo կործանիչներով, այնուամենայնիվ, Թայվանը ձգտում է հաջորդ սերնդի կործանիչների արտադրության նախապատրաստությունները տեսնել օր առաջ:
«Երբ խոսքը գնում է հաջորդ սերնդի կործանիչների մշակման մասին, մենք հուսով ենք, որ Ամերիկայի Միացյալ Նահանգները կաջակցի Թայվանին»,- հայտարարել է AIDC-ի նախագահ Հու Քայ-Հունգը:
AIDC-ը լուրջ փորձ ունի կործանիչների արտադրության գործում. 2020 թվականին վերջինս փորձարկել է ռեակտիվ AT-5 Brave Eagle-ը, որը Թայվանի առաջին ռեակտիվ ինքնաթիռն է։ Բացի այս, AIDC-ը մասնագիտացված է նաև կործանիչների արդիականացման գործում։
