Գարեգին Երկրորդ. Աստվածսիրությունից է բխում հայրենասիրությունը

ԵՐԵՎԱՆ, 24 ՀՈՒՆԻՍԻ, Times.am: Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը, «Քրիստոնյա ընտանիք՝ պաշտպանված հայրենիք» խորագրով հոգևոր, ազգային-մշակութային միջոցառումների շրջանակներում, Մայր Աթոռ Սուրբ Էջմիածնում ընդունել է ՀՀ ԶՈՒ 5-րդ բանակային կորպուսի զորամիավորումների և Արմավիրի կայազորի սպաներին՝ իրենց ընտանիքներով:

Մայր Աթոռի տեղեկատվական համակագի հաղորդմամբ, սա Ամենայն Հայոց Հայրապետի օրհնությամբ 2019 թվականն ընտանիքի տարի հռչակելու առիթով ՀՀ ԶՈՒ հոգևոր առաջնորդության կազմակերպած առաջին ուխտագնացությունն էր դեպի Սուրբ Էջմիածին: Սպաներն իրենց ընտանիքներով նախ ճանաչողական այցելություն են կատարեցին Մայր Աթոռ Սուրբ Էջմիածնի թանգարաններ՝ հաղորդակցվելով հայոց դարավոր հոգևոր սրբություններին, որից հետո հանդիպում ունեցան Նորին Սրբության հետ:

Ողջույնի խոսքով հանդես է եկել ՀՀ ԶՈԻ հոգևոր առաջնորդ Գերաշնորհ Տ. Վրթանես եպիսկոպոս Աբրահամյանը` շնորհակալություն հայտնելով Նորին Սրբությանը մշտապես Հայոց բանակի կողքին լինելու և աջակցելու համար:

Այնուհետև Վեհափառ Հայրապետն իր մասնավոր գնահատանքն է բերել հրամանատարներին, սպաներին և նրանց ընտանիքներին իրենց հայրենասիրության ու աստվածսիրության համար: Նորին Սրբությունը մասնավորաբար սպաների ուշադրությանը հանձնել է այն հանգամանքը, որ աստվածսիրությունից է բխում հայրենասիրությունը:

«Մեծագույն պատվիրանը, որ Աստված տվեց մեզ, դա սիրո պատվիրանն է. սեր ինչպես միմյանց նկատմամբ, այնպես էլ հայրենիքի, ազգի ու ընտանիքի հանդեպ: Ամեն բան իբրև մնայուն արժեք կերտվել է սիրով: Բոլոր մնայուն արժեքները ստեղծվել են մեր հոգում հանդեպ մեր հայրենիքը, մեր Եկեղեցին ու մեր Աստված ունեցած սիրուց», – նշել է Ամենայն Հայոց Կաթողիկոսը` հավելելով, որ հայ զինվորի ու հրամանատարի ծառայությունն ու պայքարը իրենց զավակների, հայրենիքի ապահով և խաղաղ կյանքն է:

Գարեգին Բ Վեհափառը կարևորել է նաև Հայոց Եկեղեցու ամուր կապը և գործակցությունը ՀՀ Զինված Ուժերի հետ` մասնավորապես անդրադառնալով յուրաքանչյուր սպայի կյանքում հոգևոր սպասավորների դերին, քանի որ վերջիններս ամենօրյա ծառայություն են իրականացնում հայ սպաների հետ՝ նրանց քրիստոնեական ոգին մշտավառ պահելու և հոգևոր արժեքներով սնելու համար:

Իր սերն ու խոնարհումը բերելով ներկա սպաներին իրենց հայրենանվեր ծառայության համար` Վեհափառ Հայրապետը հաստատել է, որ Հայոց բանակի քաջարի զինվորները, հրամանատարները և նրանց ընտանիքները հանապազ իր աղոթքներում են:

Վերջում Նորին Սրբությունը մաղթել է, որ Տերն Իր մշտական օրհնության ներքո պահի հայ զինվորականներին և նրանց ընտանիքներին, որպեսզի հավատով և քաջեռանդ շարունակեն իրենց նվիրյալ ծառայությունը:

ՀՀ ԶՈւ 5-րդ բանակային կորպուսի անունից ելույթ է ունեցել նաև կորպուսի հրամանատար գնդապետ Անդրանիկ Փիլոյանը՝ շնորհակալություն հայտնելով ՀՀ Զինված Ուժերի հանդեպ Վեհափառի մշտական ուշադրության համար:

Հանդիպման ավարտին հոգևոր և ազգային երգերի կատարումներով հանդես են եկել Արարատյան Հայրապետական թեմի Սուրբ Աննա եկեղեցու «Գանձեր» երգչախումբը: