Շաքիում ադրբեջանցու կողմից վիրավորված Անի Ավետիսյանը վիրահատվում է. հայտնի են նոր մանրամասներ
Կարդացեք նաև
Սյունիքի մարզի Շաքի բնակավայրում ՀՀ սահմանն ապօրինի հատած ադրբեջանցի զինծառայող Նասիմի Մուսաևի հարձակման հետևանքով հրազենային վիրավորում ստացած Անի Ավետիսյանը տեղափոխվել է վիրահատարան։ Ինչպես Փաստինֆո լրատվականին հայտնել է տուժածի քույրը՝ Արփի Ավետիսյանը, կնոջ վիճակը գնահատվում է ծանր, առկա է ազդրի բազմաբեկորային կոտրվածք, վնասվել են անոթները, և առաջացել է արյան մեծ կորուստ։
Բժիշկների փոխանցմամբ՝ ոսկորի փշրվելու պատճառով անհրաժեշտ է տեղադրել իմպլանտ, ինչից հետո սպասվում է երկարատև ապաքինում, իսկ վեց ամիս անց կպահանջվի ևս մեկ վիրահատություն։ Հարձակման ընթացքում վնասվածքներ են ստացել նաև Անի Ավետիսյանի երեխաները։ Նրանցից մեկի ձեռքը, որը վնասվել էր հարվածից, արդեն վիրահատել են, և այն գտնվում է գիպսակապի մեջ։
Ադրբեջանցի զինծառայողի ներթափանցման մասին հայտնի էր դարձել հոկտեմբերի 1-ին, երբ ՀՀ ԱԱԾ-ն հայտնեց, որ ադրբեջանական կողմը սեպտեմբերի 29-ին տեղեկացրել էր զինծառայողի անհետացման մասին։ Բնակարան ապօրինի մուտք գործած և կնոջ վրա կրակած ադրբեջանցուն չեզոքացրել է հենց տուժած կինը։
Դեպքի առթիվ նախաձեռնված քրեական վարույթի շրջանակներում Նասիմի Մուսաևի նկատմամբ հարուցվել է քրեական հետապնդում՝ պետական սահմանն ապօրինի հատելու, ռազմամթերքի մաքսանենգության, զենքի գործադրմամբ առողջությանը վնաս պատճառելու և ապօրինի բնակարան ներխուժելու հոդվածներով։ Դատարանի որոշմամբ նրա նկատմամբ որպես խափանման միջոց է ընտրվել կալանավորումը։
Հետևեք մեզ նաև Telegram-ում