Ս. Օհանյան. Ծայրամասերի ամրացումից է կախված, թե ինչպիսին կլինի ընդհանուր պաշտպանությունը

Այսօր, ապրիլի հինգին Քարվաճառի ազատագրման 20-ամյակի կապակցությամբ գումարված հանդիսավոր նիստին, որին մասնակցում էին Արցախի Հանրապետության նախագահ Բակո Սահակյանը, Արցախի Պաշտպանության Բանակի հրամանատար Մովսես Հակոբյանը, Արցախի թեմի առաջնորդ Պարգեւ արքեպիսկոպոս Մարտիրոսյանը, բազմաթիվ զինվորականներ, ՀՀ Պաշտպանության նախարար Սեյրան Օհանյանը հանդես եկավ ողջույնի խոսքով:

«Արցախյան գոյապայքարը, որը վերածվեց հայկական ազատագրական պայքարի, զարդարում է մեր նորօրյա պատմությունը», նշեց նա եւ հավելեց, որ Քարվաճառի ազատագրումը այդ պատմության կարեւոր էջերից է:

«Քարվաճառի ազատագրման օպերացիան իրականացվեց բոլորի ջանքերով: Փառք ու պատիվ բոլոր նրանց, ովքեր ընկան այդ պայքարում եւ փառք ու պատիվ բոլոր նրանց, ովքեր ապրում են եւ շարունակում են իրենց գործունեությունը»: Ըստ Պաշտպանության նախարարի, Արցախն այսօր զարգանում է օր օրի: Իսկ Քարվաճառում նա հատկապես հատկանշական համարեց այն փաստը, որ այստեղ քաղաքացիական հասարակությունն ու բանակը միաձուլված են, անբաժան:

«20 տարիների ընթացքում մենք զարգանում ենք, ամրացնում մեր երկրի սահմանները: Շնորհավորում եմ բոլոր նրանց, ովքեր ապրում են այստեղ», ելույթն ավարտեց նախարարը: Հանդիսավոր նիստից հետո պատասխանելով լրագրողների հարցերին` Սեյրան Օհանյանը նշեց, որ Քարվաճառի ազատագրման օրերին ինքը ՊԲ շտաբի պետն էր եւ օպերացիայի մշակման անմիջական մասնակիցն է եղել, ինչպես նաեւ մասնակցել է վերահսկմանը:

«Կարծում եմ, որ այսպիսի աշխարհագրական դիրքում գտնող տարածաշրջանում այդքան կարճ ժամանակահատվածում այդպիսի մարտական գործողություններ իրականացնելը հայ ժողովրդի պատիվն է, արժանապատվությունը, եւ եւս մեկ անգամ հուշում է, որ մենք ամբողջ պատմության ընթացքում մոտ ենք եղել ռազմական գիտությանը եւ այսօր էլ հաղորդակից ենք դրա համաշխարհային զարգացումներին»:

Խոսելով Քարվաճառից այսօր ստացած տպավորությունների մասին' Օհանյանն ասաց. «20 տարի անց ես ուրախություն եմ ապրում, որ զգում եմ զինվորի եւ քաղաքացու միասնությունը: Իսկ այնտեղ, որտեղ նրանք միասնական են, նրանք անպարտելի են»:

Պատասխանելով Times.am-ի թղթակցի հարցին Քարվաճառի այսօրվա պաշտպանական դերի մասին' ՀՀ Պաշտպանության նախարարը նշեց. «Յուրաքանչուր հատված մեծ նշանակություն ունի պաշտպանական համակարգի իրականացման համար: Բայց հատկապես կարեւոր է հենց այս հատվածի պաշտպանությունը, ընդհանրապես Լեռնային Ղարաբաղի ծայրամասերը պետք է ամուր պահել, ծայրամասերի ամրացումից է կախված, թե ինչպիսին կլինի ընդհանուր պաշտպանությունը»:

Թամարա Գրիգորյան